გამოცხადებულია ტენდერი 32 ტონა ძროხის ხორცისა და 280 ტონა პურის შესაძენად


 

280 ტონა პური, 109 ტონა კარტოფილი, 10 ტონამდე ზეთი, 16 ტონა თევზი, 11 ტონა სოსისი, 32 ტონა ძროხის ხორცი, 8 ტონა ძროხის ძვალი, 13 ტონა ქათმის ბარკალი, 25 ტონა კომბოსტო, 19 ტონა ლობიო, 11 ტონა წიწიბურა, 27 ტონა ახალი ხილი, ასევე ტონობით ჭარხალი, ხახვი, სტაფილო, ნიორი, შაქარი, მაკარონი, მარილი, მწვანილი, ტომატი – ეს იმ პროდუქტების ჩამონათვალია, რომლებიც მომავალი წლისთვის უნდა შეიძინოს ბათუმის სოციალური სერვისების სააგენტომ.

სააგენტომ ზემოაღნიშნული პროდუქტების შესაძენად რამდენიმე ტენდერი გამოაცხადა. შესყიდვის სავარაუდო ღირებულება კი, სატენდერო დოკუმენტების მიხედვით 1 365 628 ლარია.

სოციალური სერვისების სააგენტო აღნიშნულ პროდუქტებს „უპოვართა სასადილოებისთვის“ შეიძენს. ასეთი სულ ხუთი სასადილო ფუნქციონირებს ბათუმში:  სასადილო N1   ბათუმი, ტაბიძის ქ. N2; სასადილო N2  ბათუმი, ლერმონტოვის ქუჩაზე. N92; სასადილო N3  ბათუმი, კიკვიძის ქ. N7; სასადილო N4 ქ. ბათუმი, ფრიდონ ხალვაშის გამზირი N493 და სასადილო N5 ქ. ბათუმი, თამარ მეფის გამზირი, მე-3 შესახვევი N2.

აღნიშნული სასადილოებით 2644  ბენეფიციარი სარგებლობს ყოველდღიურად; ამასთან, ამ სასადილოებში დასაქმებულია 55  ადამიანი [პერსონალიც სასადილოში მომზადებული კერძებით იკვებება].

ბათუმის მერიაში კი განმარტავენ რომ ტენდერი 2015 წლისთვისაა გამოცხადებული და მუნიციპალიტეტის ინფორმაციით მომავალ წელს ბენეფიციერთა რაოდენობა იზრდება.

ნეტგაზეთის მასალების სხვა გამოცემებში გადაბეჭდვის წესი
" ბათუმელები"