Batumelebi | დინა ოგანოვას “ჩემი სივრცე” ბათუმში დინა ოგანოვას “ჩემი სივრცე” ბათუმში – Batumelebi
RU | GE  

დინა ოგანოვას “ჩემი სივრცე” ბათუმში

 

დღეს, 21 ნოემბერს, თანამედროვე ხელოვნების სივრცეში ფოტოგრაფ დინა ოგანოვას პერსონალური გამოფენა – „ჩემი სივრცე“ – გაიხსნა.  

 

გამოფენაზე წარმოდგენილი ფოტოების უმრავლესობა საძინებელშია გადაღებული, ფოტოებს თან ერთვოდა ფოტოზე გამოსახულ დამიანთან ინტერვიუ. დამთვალიერებლებს აგრეთვე შეეძლოთ ფოტოზე აღბეჭდილი ადამიანების აუდიო ჩანაწერის მოსმენა. 

 

„პროექტი განხორციელდა ფონდ “ღია საზოგადოება საქართველოს“ ხელშეწყობით, პირველი გამოფენა იყო თბილისში, შემდეგ გადავწყვიტეთ, რომ ჩამოგვეტანა ეს სერია ბათუმში, რადგანაც ეს გამოფენა არა მხოლოდ თანამედროვე გამოწვევას პასუხობს, არამედ ხელოვნების მხრივაც ძალიან საინტერესოა. ფოტოებთან ერთად საინტერესოა ეს ინტერვიუები, თუ როგორ ხედავენ ადამიანები საკუთარ მეს, იხსენებენ ყველაზე მნიშვნელოვან მომენტებს, ყვებიან, თუ რა პერიპეტიები გაიარეს ცხოვრებაში. შინაარსობრივად, ვფიქრობ, საინტერესოა როგორც პერსონაჟები, ასევე მათი ისტორიები. ეს ხმოვანი ინსტალაცია კი განსაკუთრებულად უხდება ამ ფოტოგამოფენას” – აღნიშნა „ბათუმელებთან“ თანამედროვე სახელოვნებო სივრცის პიარ-მენეჯერმა ლაშა ფალავანდიშვილმა. 

 

დინა ოგანოვა თავისუფალი ფოტოგრაფია. იგი მუშაობდა ფოტოჟურნალისტად ქართულ საინფორმაციო სააგენტოებსა და ჟურნალებში და გახლდათ რამდენიმე ფილმის ფოტოგრაფი. მისი ნამუშევრები წარმოდგენილი იყო საქართველოში, უკრაინაში, პოლონეთში, შვედეთში, თურქეთსა და ბანგლადეშში. მისი ფოტოები დაბეჭდილია რამდენიმე წიგნში, მათ შორის, „ერთად ცხოვრება“, დაფინანსებული ბრიტანეთის საბჭოს მიერ( 2009), ProArt ფოტოგრაფია– დაფინანსებული პროკრედიტ ბანკის მიერ (2011) და ფოტოკონკურს ,,ქოლგის“ ყველა გამოცემაში 2007 წლიდან.

 

გამოფენა ბათუმში  შვიდ დეკემბრამდე გაგრძელდება. 

ნეტგაზეთის მასალების სხვა გამოცემებში გადაბეჭდვის წესი
ქეთი ლაბაძე