Batumelebi | ირაკლი ღარიბაშვილის მხარდამჭერთა ცენტრები საქართველოს რეგიონებში ირაკლი ღარიბაშვილის მხარდამჭერთა ცენტრები საქართველოს რეგიონებში – Batumelebi

ირაკლი ღარიბაშვილის მხარდამჭერთა ცენტრები საქართველოს რეგიონებში

 

აჭარის მუნიციპალიტეტებში პრემიერ ღარიბაშვილის მხარდამჭერთა ცენტრებს ქმნიან. ეს ინფორმაცია „ბათუმელებს“  საჯარო მოხელეებმა არაოფიციალურ საუბარში დაუდასტურეს. „ჩვენ მეტი არაფერი ვიცით, მხოლოდ საორგანიზაციო საკითხების მოგვარებაში გვთხოვეს დახმარება“, – გვითხრეს მათ. 

 

ხელვაჩაურის მუნიციპალიტეტში ასეთი ცენტრი უკვე შექმნილია და მას ყოფილი პოლიციელი ხელმძღვანელობს – ამის შესახებ „ბათუმელებს“ რამდენიმე წყარომ დაუდასტურა. ინფორმაციას თავად ზურაბ ირემაძე უარყოფს. მას ტელეფონით დავუკავშირდით.

 

 

 „მე ჩვეულებრივი მოქალაქე ვარ, არ მაქვს ამ ამბავთან კავშირი“, – ამბობს ის.

 

ხულოში მსგავსი ცენტრის შექმნას უარყოფს გამგებელი ბესიკ ბაუჩაძე.

 

ქობულეთის გამგებელს სულხან ევგენიძეს კი ქობულეთში მსგავსი ცენტრის შექმნის შესახებ ინფორმაცია ნაწილობრივ აქვს:

 

„რაღაც მსგავსი მსმენია, მაგრამ ვერ მოვასწარი გადამემოწმებინა, თუ რა ცენტრზეა საუბარი“, – უთხრა მან „ბათუმელებს“.  

 

ქედაში პრემიერ ღარიბაშვილის მხარდამჭერთა ცენტრის შექმნის შესახებ იცის  მუნიციპალიტეტის გამგებელმა დავით დუმბაძემ:

 

„ვიცი, რომ ეს არის არასამთავრობო ორგანიზაცია, რომელსაც არც ხელისუფლებასთან და არც პრემიერთან კავშირი არ აქვს. გამომდინარე აქედან, მათი საქმიანობით არ დავინტერესებულვარ და არც ის ვიცი, ვინ ხელმძღვანელობს ორგანიზაციას.“

 

„პრემიერის მხარდამჭერთა ცენტრებზე ინფორმაცია დავით ხიზანიშვილთან უნდა გადაამოწმოთ. ცენტრების შექმნას მთელს საქართველოში ის ხელმძღვანელობს“, – უთხრეს „ბათუმელებს“ ხელვაჩაურის გამგეობაში.

 

დავით ხიზანიშვილის განმარტებით, მან დაარსა არასამთავრობო ორგანიზაცია, რომელისაც „საქართველოს ახალი დემოკრატები“ დაარქვა.

 

„როცა ორგანიზაცია დაფუძნდა, იყო ირაკლი ღარიბაშვილის, როგორც პოლიტიკოსისა და პრემიერის მხარდამჭერი ორგანიზაცია. ამის შესახებ პრემიერმა არ იცოდა, ჩვენი სურვილით გავაკეთეთ. “

 

 რაც შეეხება ორგანიზაციის დაფინანსებას. დამფუძნებლის თქმით, ორგანიზაციას ამ დროისთვის  დაფინანსება და შემოწირულობები არ აქვს: „და არც ქონია დაარსების დღიდან.“

 

დამფუძნებელი არ ამხელს ინფორმაციას ორგანიზაციის მიზნებსა და მიმართულებებზე:

 

„მიმდინარეობს მოსამზადებელი სამუშაოები და უახლოეს დღეებში პრესკონფერენციაზე განვაცხადებთ ყველფერს.“

 

ორგანიზაციის დამფუძნებელი ასევე აცხადებს, რომ ოფისების გახსნა რეგიონებშიც იგეგმება, თუმცა ჯერ ამ კუთხით მუშაობა არ დაუწყიათ.

 

 

 

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე