რამდენიმე დღეა ზღვაში გაუჩინარებულ კობა ბაკურიძეს სამაშველო სამსახური ეძებს. ოჯახის წევრების თქმით, ის 3 ივლისს ბათუმში, ანბანის კოშკის მიმდებარე პლაჟზე შენიშნეს, თუმცა საღამოს შვიდი საათის შემდეგ, მისი კვალი იკარგება.
კობა ბაკურიძის ძმის, თამაზ ბაკურიძის თქმით, ოჯახის მოთხოვნა, რომ გადამოწმებულიყო სანაპიროზე არსებული სათვალთვალო კამერები გუშინ [8 ივლისს] დაკმაყოფილდა, თუმცა, თვითმიხლველების ნაამბობი, რომ თითქოს მათ კობა ნახეს ხმელეთზე „შერატონის“ მიმდებარედ არ დადასტურდა.
„სათვალთვალო კამერებიდან მასალების ამოღების პროცესში თვითმხილველებმა გამოძიებაში მიცემული ჩვენება შეცვალეს და აღნიშნეს, რომ კობა არა 3 რიცხვში, არამედ 2 ივლისს, საღამოს დაინახეს სანაპიროზე. გასაკვირია ის არის რომ კობა 2 ივლის მაგ დროს საერთოდ არ ყოფილა ზღვაზე და ბუნებრივია ვერც სანაპიროზე დაინახავდენ… თუ დავეყრდნობით მაშველების და ერთი თვითმხილველის ჩვენებას, რომლებაც კობა ბოლოს დაინახეს როგორ შევიდა ზღვაში, მაშინ უნდა გავაძლიეროთ სამძებრო-სამაშველო ოპერაცია ზვაზე და სანაპიროზე“ – წერს თამაზ ბაკურიძე.
„ბათუმელებთან“ საუბარში თამაზ ბაკურიძემ აღნიშნა, რომ სამძებრო სამუშაოები ამ წუთებშიც მიმდინარეობს ზღვაზე – გრიგოლეთის, ქობულეთის, ჩაქვის, მახინჯაურისა და ბათუმის მიმდებარე აკვატორიაში. მისივე თქმით, „წუხელ იყო სიგნალი, რომ ზღვამ გრიგოლეთში მამაკაცის ცხედარი გამორიყა. თუმცა, გადამოწმების შემდეგ სხვა აღმოჩნდა, რომელიც გუშინ შესულა ზღვაში და გუშინვე იპოვეს“.
