Batumelebi | მუსლიმებისა და პრემიერ-მინისტრის შეხვედრა ბათუმში მუსლიმებისა და პრემიერ-მინისტრის შეხვედრა ბათუმში – Batumelebi

მუსლიმებისა და პრემიერ-მინისტრის შეხვედრა ბათუმში

 

საქართველოს პრემიერ-მინისტრი ირაკლი ღარიბაშვილი 16 ოქტომბერს, ბათუმში, დასავლეთ საქართველოს მუფთს, ჯემალ პაქსაძეს და მუსლიმებს შეხვდა. ქართველი მუსლიმები ქობულეთში მუსლიმური პანსიონის ფუნქციონირების და ბათუმში ახალი მეჩეთის მშენებლობის დაწყების საკითხზე პრემიერ-მინისტრის გადაწყვეტილებას ელოდნენ. შეხვედრას აჭარის მთავრობის თავმჯდომარე, არჩილ ხაბაძეც ესწრებოდა. 

 

 

პრემიერ-მინისტრი ქართველ მუსლიმებს შეხვდა

 

 

 „კონკრეტული არაფერი გამოკვეთილა. ჩვენ გავაცანით ჩვენი პრობლემები  და ველოდებით პრემიერის ბოლო დასკვნას. იმედი მაქვს, გადაწყვეტილება იქნება მიღებული“ – აცხადებს მუფთი ჯემალ პაქსაძე.  

 

როდის დაიწყება მეჩეთის მშენებლობა, კონკრეტული ვადა, როგორც მუსლიმები აცხადებენ, პრემიერს ამ შეხვედრაზე არ დაუსახელებია. ჯემალ პაქსაძის თქმით, ხელისუფლებას გადაწყვეტილება არც იმასთან დაკავშირებით აქვს მიღებული, თუ სად შეიძლება აშენდეს ახალი მეჩეთი. 

 

გააგრძელებს თუ არა ქობულეთში მუსლიმური პანსიონი ფუნქციონირებას? ამ კითხვაზე პასუხს ორგანიზაცია „ქართველ მუსლიმანთა ურთიერთობის“  თავმჯდომარე რამაზ კაკალაძე სწორედ ამ შეხვედრაზე ელოდა. „ბათუმელებთან“ წინა კვირას გაკეთებულ კომენტარში ის აცხადებდა, რომ საბოლოო გადაწყვეტილება პრემიერს 20 ოქტომბრამდე უნდა მიეღო.   

 

„ვიყავი პრემიერთან შეხვედრაზე. იყო პრობლემებზე საუბარი, პრემიერ-მინისტრმა თქვა, რომ ყველაფერი კანონის ფარგლებში იქნება“ – აღნიშნა რამაზ კაკალაძემ „ბათუმელებთან“.

 

ამჟამად პანსიონში სწავლა არ მიმდინარეობს და მხოლოდ ერთი ადამიანი მორიგეობს შენობაში. მუსლიმურ პანსიონში სწავლა  15 სექტემბერს უნდა დაწყებულიყო, თუმცა სასწავლებლის გახსნას ხელი ადგილობრივმა ქრისტიანმა  მოსახლეობამ შეუშალა. მათი განცხადებით, ქრისტიანულ დასახლებაში მუსლიმური პანსიონი არ უნდა ფუნქციონირებდეს. 

 

სასწავლებლის გახსნას ინცინდენტიც მოჰყვა, ადგილობრივებმა მუსლიმური სასწავლებლის კარზე ღორის თავი მიაჭედეს. 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე