წუხელ ზღვაში კიდევ ერთი, 25 წლის მამაკაცი გაუჩინარდა


აჭარის სამაშველო სამსახურის ინფორმაციით, წუხელ, დაახლოებით 20 საათზე, ზღვაში შევიდა 25 წლის ახალგაზრდა მამაკაცი და გაუჩინარდა. შემთხვევა მოხდა გონიოში, პოლიციის საგუშაგოს მიმდებარე პლაჟზე.

სამაშველო სამსახურში ამბობენ, რომ 5-ბალიანი შტორმის გამო ზღვაში სამუშაოები შეფერხდა. ამ უწყების ინფორმაციით, დღეს დილიდან განახლდა სამაშველო სამუშაოები – ორი კატერი და ორი მყვინთავი ეძებს გაუჩინარებულს.

სამაშველო სამსახურის ინფორმაციით, ასევე გრძელდება 44 წლის კობა ბაკურიძის ძებნაც. კობა ბაკურიძე ანბანის კოშკის მიმდებარე ტერიტორიაზე 3 ივლისს შევიდა ზღვაში საბანაოდ. ამ დრომდე მისი ძებნაც უშედეგოდ მიმდინარეობს.

სამაშველო სამსახურის ინფორმაციით, შტორმი ბათუმის სანაპიროზე დღესაც შენარჩუნდება. სანაპიროზე წითელი ალმებია აღმართული, შესაბამისად, ზღვაში შესვლა აკრძალულია.

წითელი ალამი ბათუმის პლაჟზე - ბანაობა აკრძალულია / 6.07.2017 /

წითელი ალამი ბათუმის პლაჟზე – ბანაობა აკრძალულია / 6.07.2017 /

 

ნეტგაზეთის მასალების სხვა გამოცემებში გადაბეჭდვის წესი
ავტორი
ეთერ თურაძე არის გაზეთ "ბათუმელების" მთავარი რედაქტორი 2001 წლიდან