Batumelebi | დღეს ბათუმში ანიმაციური ფილმების ფესტივალი იხსნება დღეს ბათუმში ანიმაციური ფილმების ფესტივალი იხსნება – Batumelebi
RU | GE  

დღეს ბათუმში ანიმაციური ფილმების ფესტივალი იხსნება

 

ბათუმში დღეს ანიმაციური ფილმების მე-6 საერთაშორისო ფესტივალი „თოფუზი“ იხსნება. საფესტივალო  ფილმების ჩვენება დილიდან ფრანგული ანიმაციით დაიწყო კინოთეატრ „აპოლოში“. ფესტივალის ორგანიზატორებმა ერას მოედანზე კარავი გაშალეს, სადაც ბათუმის სამხატვრო სასწავლებლის მოზარდებს  საშუალება აქვთ ნახონ როგორ იქმნება ანიმაცია.  ბათუმამდე საფესტივალო ჩვენებები მოეწყო ხულოში, შუახევსა და ქედაში. 

„თოფუზი“ მეექვსედ ტარდება ჩვენს რეგიონში. ძალიან საინტერესო და მრავალფეროვანი პროგრამა აქვს ფესტივალს.  წელს კიდევ უფრო გაიზარდა (ხულო, შუახევი, ქედა დაემატა  ფესტივალს)   პროგრამა და გამრავალფეროვნდა.

ასევე საგანმანათლებლო ნაწილი საკმაოდ ძლიერი აქვს ამ ფესტივალს, ბავშვები ხატავენ და სწავლობენ ანიმაციური ფილმის კეთებას,“ – ამბობს აჭარის განათლების, კულტურისა და სპორტის სამინისტროს კულტურის დეპარტამენტის უფროსი ირინა სურმანიძე.

ფესტივალის მხარდამჭერი სწორედ აჭარის განათლების კულტურისა და სპორტის სამინისტროა.

„ანიმაციური ფილმების ფესტივალზე 40-ზე მეტი ქვეყნიდან გამოგვიგზავნეს საკონკურსო ფილმები.  ჟიური შედგება ხუთი წევრისაგან. ამასთან ცალკეა საბავშო ჟიური. თერთმეტი ბავშვისგან შემდგარი ჟიური აარჩევს საუკეთესო საბავშვო ფილმს,“- ამბობს ფესტივალის კოორდინატორი ნოდარ ქარელი.

ფესტივალის ოფიციალური გახსნის საღამო ბათუმის დრამატულ თეატრში დღეს 7 საათზე გაიმართება. ნაჩვენები იქნება ანიმაციური ფილმი „პიტერი და მგელი“.

ფილმების ჩვენებაზე დასწრება უფასოა და ნებისმიერ მსურველს შეუძლია. 10-11 ოქტომბერს სეანსები კინოთეატრ „აპოლოში“ 10:00, 12:00, 14:00 და 18:00 საათზე გაიმართება. 11 ოქტომბერს 19:00 საათზე კი ფესტივალი საზეიმოდ დაიხურება.

 

 

 

ვორქშოფი ერას მოედანზე

 

ნეტგაზეთის მასალების სხვა გამოცემებში გადაბეჭდვის წესი
მანანა ქველიაშვილი