Batumelebi | რას სთავაზობს ყოფილ პატიმრებს რეაბილიტაციის პროგრამა – შეხვედრა ბათუმის მერიაში რას სთავაზობს ყოფილ პატიმრებს რეაბილიტაციის პროგრამა – შეხვედრა ბათუმის მერიაში – Batumelebi
RU | GE  

რას სთავაზობს ყოფილ პატიმრებს რეაბილიტაციის პროგრამა – შეხვედრა ბათუმის მერიაში

 

დღეს, 7 ოქტომბერს, ბათუმის მერიაში დანაშაულის პრევენციის ცენტრის დირექტორი ჯონი კვინიკაძე ბათუმის მერს, გიორგი ერმაკოვს შეხვდა. შეხვედრაზე ყოფილ პატიმართა რეაბილიტაციისა და რესოციალიზაციის პროგრამაზე და  დასაქმებისა და გადამზადების გზებზე ისაუბრეს.  

 

ამ ეტაპზე, ყოფილ პატიმართა რეაბილიტაციის პროგრამა პატიმრებს სამი ტიპის მომსახურებას სთავაზობს: ფიზიკური და ფსიქიკური პრობლემების მოგვარება, პროფესიული გადამზადება და დამსაქმებელთან რეკომენდაცია ან დამსაქმებლის მოძიება.

 

„უნდა გითხრათ, რომ  ეს  კომპლექსური საკითხია, ამაზე არა მარტო სახელმწიფო სტრუქტურებმა უნდა ითანამშრომლონ, არამედ არასამთავრობო სექტორმა და საერთაშორისო ორგანიზაციებმა  და რაც მთავარია,  კერძო სექტორმა“ – განაცხადა ჯონი კვინიკაძემ.  

 

მისივე თქმით, ამ ეტაპზე, პროგრამის ფარგლებში 98 ყოფილი პატიმარია დასაქმებული. „უნდა გითხრათ, რომ ძალიან ხშირად ჩვენ შეთავაზებულ სამსახურზე უარს გვეუბნებიან სხვადასხვა მიზეზის გამო, ზოგ შემთხვევაში გასაგებიც არის, მრავალი წელი ადამიანი იჯდა  საპატიმროში და გადაჩვეულია,  უჭირს 8 საათიან რეჟიმში მუშაობა“ –  აღნიშნა ჯონი კვინიკაძემ.    

  

„ეს არის სოციალური პრობლემა, რომელიც უნდა მოგვარდეს“ – განაცხადა გიორგი ერმაკოვმა, რომელმაც ყოფილი პატიმრების სხვადასხვა, მიმდინარე პროგრამებში ჩართვის შესაძლებლობებზე ისაუბრა.  

 

პატიმრებზე სახელმწიფომ განსაკუთრებული ზრუნვა 2012 წლის დეკემბრიდან დაიწყო, როდესაც იუსტიციის მინისტრის ინიციატივით, ცენტრის ბაზაზე „ყოფილ პატიმართა რეაბილიტაციისა და რესოციალიზაციის პროგრამა“ დაფუძნდა. ცენტრი სახელმწიფო ბიუჯეტიდან მილიონ-ნახევარი ლარით ფინანსდება. ამჟამად, ფილიალები თბილისის გარდა მუშაობს გორში, ქუთაისსა და ბათუმში, უახლოეს ხანში კი გაიხსნება ზუგდიდსა და მარნეულში.

 

 

ნეტგაზეთის მასალების სხვა გამოცემებში გადაბეჭდვის წესი
(მოხალისე) , თაკო ათაბაგი