მუნიციპალიტეტის გამგებლების პირველ მოადგილეებს შორის, აჭარის რეგიონის მასშტაბით, ყველაზე მაღალი ანაზღაურება – 1 700 ლარი, ქედის გამგებლის პირველ მოადგილეს, გურამ ბერიძეს აქვს.
გურამ ბერიძის თანამდებობრივი სარგო 1 700 ლარია. ხელფასი გასული წლის საპარლამენტო არჩევნებამდე ერთი კვირით ადრე გაუზარდეს, პირველი მოადგილის თანამდებობრივი სარგოს 400 ლარით გაზრდასთან დაკავშირებით კი გადაწყვეტილება ქედის საკრებულომ 2016 წლის 30 სექტემბერს მიიღო.
ქედის გამგებელს შტატით სულ სამი მოადგილე უნდა ჰყავდეს, თუმცა ერთი მოადგილის თანამდებობა ვაკანტურია, ხოლო მეორე მოადგილის სახელფასო სარგო 1 300 ლარია.
გურამ ბერიძის შემდეგ, თანამდებობრივი სარგოს ოდენობით ხულოს გამგებლის, ბესიკ ბაუჩაძის პირველი მოადგილე 1 500 ლარით ლიდერობს, ქედის მუნიციპალიტეტის მსგავსად, აქ გამგებლის მოადგილეების ხელფასი 1 300 ლარია.
სამი მოადგილე ჰყავს ხელვაჩაურის მუნიციპალიტეტის გამგებელს ნადიმ ვარშანიძეს. მის პირველ და შემდგომ მოადგილეებს ერთნაირი თანამდებობრივი სარგო აქვთ. მათი ხელფასი 1 300 ლარია, ანალოგიური ოდენობის თანამდებობრივი სარგო აქვს ქობულეთის მუნიციპალიტეტის გამგებლის პირველ მოადგილესა და მოადგილეებსაც.
სამი მოადგილე ჰყავს შუახევის გამგებელს, ტარიელ ებრალიძეს. პირველი მოადგილისა და სხვა მოადგილეების ხელფასი აქ 20 ლარით განსხვავდება, პირველი მოადგილის თანამდებობრივი სარგო – 1 320 ლარია, ხოლო მოადგილეებს 1 300 ლარი აქვთ.
