ბათუმის მერიამ საკრებულოს ბიუჯეტში ცვლილებების შესახებ პროექტი წარუდგინა, რომლის მიხედვითაც ბიუჯეტი 6 მილიონ 756 ათასი ლარით იზრდება. აქედან 582 ათასი ლარი მერიამ ტრანსფერის სახით საქართველოს სახელმწიფო ბიუჯეტიდან მიიღო.
5 მილიონ 999 ათასი ლარი კი სპეციალური ტრანსფერია აჭარის რესპუბლიკური ბიუჯეტიდან. გარდა ამისა, გაზრდილია სხვა შემოსავლებიდან ამოღებული თანხაც. ბიუჯეტის ხარჯვით ნაწილში აისახება ტენდერებიდან მიღებული ეკონომიაც.
ნამატი თანხა მერიამ სხვადასხვა ღონისძიებაში გადაანაწილა. ბიუჯეტის პროექტში ახალი ღონისძიებების შესახებაცაა ასახული. ამ ღონისძიებების ჩამონათვალშია მოდის კვირეული „აჭარა ფეშენ ვიკი“ და „მის და მისტერ პლანეტა“, მოდის კვირეულისთვის ბიუჯეტში 30 000 ლარი, ხოლო მეორე ღონისძიებისთვის 61 000 ლარი გაითვალისწინეს.
ვისი ინიციატივა იყო ამ ღონისძიებების ბათუმის ბიუჯეტიდან დაფინანსება? ამ კითხვაზე ჯერ პასუხი არ გვაქვს.
საკრებულოს განათლების კომისიის თავმჯდომარის, ნინო ბერაძის ინფორმაციით, მისი კომისია მსგავსი კომერციული ღონისძიებების ბიუჯეტიდან დაფინანსებას მხარს არ უჭერს.
