ხულოს მუნიციპალიტეტის გამგებლის ბესიკ ბაუჩაძის ინიციატივით მუნიციპალიტეტის შესაბამისი სამსახურების წარმომადგენლებმა პირველადი მოხმარების ნივთები და საკვები პროდუქტების რიყეთის თემში სოციალურად დაუცველ ნუგზარ ხოზრევანიძის ოჯახს გადასცეს – ამ ინფორმაციას ხულოს მუნიციპალიტეტის პრესსამსახური ავრცელებს.
ხულოს მუნიციპალიტეტის სოფელ რიყეთში ორი თვის ანას გამოსაკვებად საჭირო თანხა ხოზრევანიძეების ოჯახს არ გააჩნია. ახალშობილის მშობლები არასრულწლოვანები არიან, ხუთსულიან ოჯახში ორი ავადმყოფია. ამის შესახებ სტატია „ბათუმელებში“ ამ კვირაში გამოქვეყნდა.
ორი თვის ანას ბედით ადგილობრივი გამგეობა და საქველმოქმედო ფონდი „დოროთეა პარკელი“ დაინტერესდა. ხულოს მუნიციპალიტეტის გამგებელმა ბესიკ ბაუჩაძემ ბავშვისა და და ოჯახის გამოსაკვებად პროდუქტები საკუთარი ხარჯებით შეიძინა. სოციალურად დაუცველი ოჯახი, სოციალური მომსახურების სააგენტოსთან ერთად ადგილობრივი მუნიციპალიტეტის სოციალური დაცვის სამსახურის უფროსმა და თემის რწმუნებულმა გუშინ მოინახულეს.
„ოჯახის შესახებ ინფორმაციას არ ვფლობდით, მუნიციპალიტეტის გამგეობისთვის დახმარების მიზნით ამ ოჯახს არასოდეს მოუმართავს. დღესვე მოვინახულეთ ოჯახი და გადავეცით საკვები პროდუქტები, რომელიც მუნიციპალიტეტის გამგებელმა ბესიკ ბაუჩაძემ საკუთარი ხარჯებით შეიძინა, მართლაც რთული მდგომარეობა დაგვხვდა, შემდგომი რეაგირებისთვის ვითარება ადგილზე შევისწავლეთ, ბავშვის კვების პრობლემის გადაჭრის მიზნით ჩვენთან ერთად იმყოფებოდა სოციალური მომსახურების სააგენტოს ხულოს სამსახურის უფროსი.
რაც შეეხება სახურავს, ინფორმაცია შეტანილია და როგორც კი გამოჩნდება მეორადი სახურავი ოჯახს გადავცემთ, მუნიციპალიტეტი ამ ოჯახს ყველანაირად დაეხმარება“, – აცხადებს ხულოს მუნიციპალიტეტის საზოგადოებასთან ურთიერთობის სამსახურის უფროსი ირმა შავაძე.
მისივე თქმით, ოჯახი კრიზისი განსაკუთრებით მას შემდეგ შეიქმნა, როცა გარდაიცვალა ბებია, რომლის პენსიაც ოჯახის მნიშვნელოვანი შემოსავალი იყო.
