Batumelebi | რატომ გაძვირდა ხორცი ბათუმში რატომ გაძვირდა ხორცი ბათუმში – Batumelebi
RU | GE  

რატომ გაძვირდა ხორცი ბათუმში

 

ახალი ცვლილების მიხედვით, ბათუმის ბაზარში ხორცის შესატანად სპეციალური დოკუმენტი,  “ფორმა #2“ -ია საჭირო, რომლის მიღებასაც პირუტყვის მეპატრონე მხოლოდ იმ შემთხვევაში შეძლებს, თუ საქონელი სპეციალურ სასაკლაოზე დააკვლევინა. ეს დოკუმენტი იმის გარანტიაცაა, რომ პროდუქტი ეკოლოგიურად სუფთა და ჯანსაღია. ახალი წესის ამოქმედებამ ბაზარში ხორცის დეფიციტი და, შესაბამისად, მისი გაძვირება გამოიწვია. მაგალითად, თუ ერთი კილოგრამი რბილი ხორცი ერთი კვირის წინ 10-12 ლარი ღირდა, ახლა უკვე 14-16 ლარი ღირს. პრობლემის მიზეზებზე „ბათუმელებს“ ბონის აგრარული ბაზრის ლაბორატორიის ვეტექიმი რეზო  გორგაძე  ესაუბრა.


რეზო გორგაძე

ბატონო რეზო, ვინ გასცემს დოკუმენტს, რომელიც ბაზარში ხორცის შემოსატანად არის საჭირო?

– პრემიერ-მინისტრის 2014 წლის 13 იანვრის ბრძანებულების თანახმად, სასაკლაოდან წამოსულ ხორცს უნდა ჰქონდეს ფორმა #2 და დამღა. ამიტომ გასაყიდი საქონელი აუცილებლად ამ სასაკლაოზე უნდა დაიკლას. ფორმა #2-ს გასცემს სასაკლაო.  ასეთი სასაკლაოები მუნიციპალიტეტებში მოქმედებს.

–  რატომ მაინცადამაინც ამ კონკრეტულმა სასაკლაომ უნდა გასცეს მათთან ლაბორატორიულად ამოწმებენ ხორცს თუ რაიმე სხვა მიზეზებიც არსებობს?

– როცა ხორცი მოაქვთ, ფორმა #2 ახლავს, მაგრამ მას ჩვენც ვამოწმებთ ადგილზე ლაბორატორიულად. თუმცა მსგავსი დოკუმენტით და სპეციალური დამღით შემოსული ხორცი შეიძლება პირდაპირ გაიყიდოს, ის შემოწმებას აღარ საჭიროებს.

მართალია, რომ ამ წესის ამუშავებამ ბაზარში ხორცის დეფიციტი გამოიწვია?

– ხორცის დეფიციტი მართლაც გამოიწვია, რადგან ქედიდან ვეღარ ჩამოიტანა გლეხმა ხორცი. ხულოში მხოლოდ ღორჯომშია სასაკლაო. წარმოიდგინეთ ხიხაძირის ხეობიდან ღორჯომში სასაკლაოზე ვეღარ აიყვანა გლეხმა საქონელი, რადგან დამატებით თითქმის 40 კილომეტრი უნდა გაიაროს.

პრობლემა იმაშია, რომ მუნიციპალიტეტებში თითო სასაკლაო ფუნქციონირებს, რაც იწვევს პრობლემებს. არის ისეთი შემთხვევები, როცა საქონელი, მაგალითად, გადავარდა, დაგორდა და ხორცი ვარგისიანია, მაგრამ სასაკლაოზე რომ არ არის დაკლული და ფორმა #2 არ აქვს, ვერ მოაქვს ბაზარში. ან თუ მოაქვს, ჩვენ ვერ შევიტანთ, რადგან დეპარტამენტიდან ვართ სასტიკად გაფრთხილებულები.

არ  შეგიძლიათ გამონაკლის შემთხვევებში  ადგილზე შეამოწმოთ ვარგისიანია თუ არა პროდუქტი?

– რა თქმა უნდა, ბაზარში სერტიფიცირებული ექიმები ვმუშაობთ, ამ დრომდე ვამოწმებდით კიდეც, მაგრამ ახლა გვეუბნებიან, რომ ფორმა #2-ის გარეშე ხორცი ბაზარში არ შეიტანოთო.

_ უკვე შემოტანილი ხორცის შენახვის პირობები ნორმებს აკმაყოფილებს?

– დახლ-მაცივრები გვაქვს, აახლებენ ძველებსაც. შეკვეთა გვაქვს მიცემული.

დეფიციტმა ხორცის ფასის გაზრდა გამოიწვიაო ამბობენ, რამდენით გაიზარდა კილოგრამი ხორცის ფასი?

_ დიახ, მართლა გაძვირდა. კილოგრამი რბილი ხორცის ფასი 15-16 ლარია, ძვლიანი ხორცის ფასი კი – 12-13 ლარი.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე