ბათუმის ცენტრალურ ქუჩებში არასწორი პარკირების შემთხვევებმა ტურისტულ სეზონზე იმატა. მძღოლები მანქანებს ტროტუარებსა და ველობილიკებზე აჩერებენ, რითაც პრობლემებს უქმნიან ფეხით მოსიარულეებს, ველოსიპედისტებსა და შეზღუდული შესაძლებლობის მქონე პირებს, რომლებიც ეტლით გადაადგილდებიან. არასწორი პარკირების ამსახველი 15-მდე ფოტო „ბათუმელებმა“ დაახლოებით ერთი საათის მანძილზე გადაიღო.
არასწორი პარკირებისას ჯარიმა 10 ლარია.
„სატრანსპორტო ინფრასტრუქტურის მართვის სააგენტოს“ ინფორმაციით 2014 წელს ამ დრომდე 11 102 ავტომობილია დაჯარიმებული არასწორი პარკირების გამო. საერთო რაოდენობაში შედის გადაუხდელი პარკირებაც.
მონიტორინგის სამსახურის უფროსის, გოჩა აბაშიძის თქმით, ქალაქში პარკირებას მათი 22 თანამშრომელი უწევს მონიტორინგს.
არასწორი პარკირებისას მძღოლებს აჯარიმებს საპატრულო პოლიციაც. შსს-ს პრესსამსახურში “ბათუმელებს“ უთხრეს, რომ მსგავსი შემთხვევების შესახებ სტატისტიკა უნდა გამოვითხოვოთ სამინისტროს საჯარო ინფორმაციის გაცემაზე პასუხისმგებელი სამსახურისგან.
