Batumelebi | არჩეული მერი გაზრდილი უფლებამოსილებით და საკადრო ცვლილებებით არჩეული მერი გაზრდილი უფლებამოსილებით და საკადრო ცვლილებებით – Batumelebi
RU | GE  

არჩეული მერი გაზრდილი უფლებამოსილებით და საკადრო ცვლილებებით

 

 

ბათუმის არჩეული მერი გიორგი ერმაკოვი უფლებამოსილების შესრულებას დღეს, 4 აგვისტოს შეუდგება. პირველივე სამუშაო დღეს ის საკადრო ცვლილებებს გეგმავს. ახალი კოდექსის მიხედვით არჩეული მერი თვითმმართველობის უმაღლესი საჯარო მოხელეა და მას გაზრდილი უფლებები ექნება.  შეცვლილია ქალაქის მთავარი საფინანსო დოკუმენტის დამტკიცების წესიც.

 

 

გიორგი ერმაკოვი

 

 

„წინასწარ ვერ გავამხელ დეტალებს, ყველაფერი მოხდება კანონიერად, ორშაბათს გაიგებთ“ – უთხრა „ბათუმელებს“ გიორგი ერმაკოვმა სატელეფონო საუბარში.   

 

 

თვითმმართველობის ახალი კოდექსის თანახმად გიორგი ერმაკოვი, როგორც არჩეული მერი მის წინამორბედთან შედარებით გაზრდილი უფლებამოსილებით ისარგებლებს.

 

 

მერის უფლებამოსილება იქნება მუნიციპალური „შპს“- ებისა და აიპების დაფუძნება; გარერეკლამის, მშენებლობისა და გარევაჭრობის ნებართვების გაცემა, ხელშეკრულებების გაფორმება მუნიციპალიტეტებთან და სხვა მსგავსი საკითხები.

 

 

იცვლება ბიუჯეტის დამტკიცების პროცედურაც. ახალი კოდექსის მიხედვით, იმ შემთხვევაში, თუ საკრებულო მერიას ბიუჯეტს დაუწუნებს და დაწუნებულ საფინანსო დოკუმენტს შენიშვნებით დაუბრუნებს უკან, ხოლო მერია შენიშვნებს არ გაითვალისწინებს, საკრებულოს აქვს უფლება საკრებულოს ერთი მესამედის მიერ ინიცირებული ბიუჯეტი დაამტკიცოს. ოღონდ ამ შემთხვევაში დოკუმენტის დასამტკიცებლად საკრებულოს უფრო მეტი საკრებულოს წევრის მხარდაჭერა დასჭირდება. „სამი მეოთხედი მაინც“, – განმარტავს საკრებულოს იურისტი სულიკო შვენთიძე. ამის შემდეგ კი მერია იძულებული იქნება საკრებულოს მიერ დამტკიცებული ბიუჯეტით იხელმძღვანელოს.

 

ახალი კოდექსით შეცვლილია საპრივატიზაციო ობიექტების ნუსხის დამტკიცების წესიც. ადერე საკრებულო მხოლოდ საპრივატიზებო ნუსხას ამტკიცებდა, პრივატიზებასთან დაკავშირებული სხვა საკითხების მოგვარება კი მერიის კომპეტენცია იყო. ამჯერად საკრებულო საპრივატიზებო გეგმაზეც იმსჯელებს.

 

საკრებულო დაამტკიცებს როგორც საკრებულოს აპარატის, ასევე მერიის საშტატო ნუსხას.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე