Batumelebi | დავით ბაციკაძე: „ნაციონალური მოძრაობა” სერიოზული პრობლემების შექმნას აპირებს“ დავით ბაციკაძე: „ნაციონალური მოძრაობა” სერიოზული პრობლემების შექმნას აპირებს“ – Batumelebi
RU | GE  

დავით ბაციკაძე: „ნაციონალური მოძრაობა” სერიოზული პრობლემების შექმნას აპირებს“

 

საარჩევნო ადმინისტრაციაში მომხდარ ცვლილებებთან დაკავშირებით  დღეს „კონსერვატიული პარტიის“ წარმომადგენელმა დავით ბაციკაძემ ბრიფინგზე ისაუბრა. მისი განცხადებით, „ნაციონალური მოძრაობა“ ადგილობრივი თვითმმართველობის არჩევნების განმეორებით ტურზე საარჩევნო უბნებზე პრობლემების შექმნას აპირებს. 

 

 

 

„სერიოზულად ემზადებიან და აპირებენ პრობლემები შექმნან უბნებზე. ამას ის ფაქტი გვაფიქრებინებს რომ წინა არჩევნების დროს, ოთხ უბანზე ჩვენი კომისიის წევრებს დისციპლინარული სასჯელები დაეკისრათ და დამკვირვებელთა თხოვნა იყო, რომ განმეორებით ტურში ეს ადამიანები აღარ დაგვენიშნა, რადგან მათ გადაცდომები ჰქონდათ. კოალიციამ მიიღო გადაწყვეტილება და შეცვალა ყველა ამ უბანზე კომისიის წევრები. მხოლოდ ტექნიკური ხარვეზის გამო ვერ მოხერხდა „რესპუბლიკელების“ მიერ წარდგენილი სამი კანდიდატის შეცვლა.  ნაციონალურმა მოძრაობამ კი არ გამოცვალა კომისიის წევრები“ – აცხადებს დავით ბაციკაძე

 

 

პრობლემურ უბნებად დავით ბაციკაძე  30-ე, 4-ე, 76-ე და 36-ე უბნებს ასახელებს: „ამასთან ერთად, 61-ე უბანზე იყო ყველაზე სერიოზული დარღვევა, სადაც მონაწილეობდნენ  „ნაციონალური მოძრაობის“ აქტივისტები, კომისიის წევრები დედა-შვილი, რომელთაც ყველაზე მძიმე სასჯელი ჰქონდათ დაკისრებული.  სასჯელების მიუხედავად, ეს პირები მაინც წარადგინეს განმეორებით არჩევნებზე. ამიტომ, ჩვენ გვაქვს ეჭვი, რომ ნაციონალური მოძრაობა არჩევნების დღეს, სერიოზული პრობლემების შექმნას შეეცდება“.

 

დავით ბავიკაძის განცხადებით, 61-ე უბანზე ნაციონალური მოძრაობის კომისიის წევრმა, ნინო მჟავანაძემ იმ დონეზე  შეაფერხა  საარჩევნო პროცესი რომ კომისიის თავმჯდომარე ცუდად გახდა და სასწრაფო დახმარების გამოძახება გახდა საჭირო. 

 

„მოვუწოდებთ ნაციონალურ მოძრაობას, რომ სასწრაფოდ გაიწვიონ  კომისიის ის წევრები, რომლებიც ამ უბნებზე ჰყავთ წარდგენილი“ – განაცხადა დავით ბაციკაძემ. 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე