Batumelebi | ქობულეთის გამგებლობის კანდიდატი კონკურენტს დებატებში იწვევს ქობულეთის გამგებლობის კანდიდატი კონკურენტს დებატებში იწვევს – Batumelebi
RU | GE  

ქობულეთის გამგებლობის კანდიდატი კონკურენტს დებატებში იწვევს

 

ქობულეთში გამგებლის პოსტის დასაკავებლად ორი კანდიდატი მეორე ტურში იბრძოლებს.  „ნაციონალური მოძრაობის“ გამგებლობის კანდიდატი რეზო ხარაზი პარტიის ოფისში გამართულ ბრიფინგზე აცხადებს, რომ მას  საარჩევნო კამპანიის წარმოება კონკურენტთან არათანაბარ პირობებში უწევს. მისი განცხადებით, „ქართული ოცნების“ კანდიდატი სულხან ევგენიძე,  ადმინისტრაციულ რესურსით სარგებლობის გარდა, ხელისუფლების მაღალჩინოსანთა მხარდაჭერითაც სარგებლობს

 

 

 

„სულხან ევგენიძე თამაზაშვილის ახლო ნათესავია და ბოლოს მუშაობდა შს სამმართველოში, ამიტომ  ყველა ძალოვანი სტრუქტურა ჩაბმულია საარჩევნო პროცესში სულხან ევგენიძის დასახმარებლად“- აცხადებს რეზო ხარაზი, კითხვაზე – რა ფორმით, კანდიდატი ამბობს, რომ ამაზე დაზუსტებულ ინფორმაციას მედიას მოგვიანებით მიწვდის. 

 

„მინდა დებატებში გამოვიწვიო „ქართული ოცნების“ კანდიდატი, რომ გასცეს ყველა იმ შეკითხვას პასუხი, რომელიც მოსახლეობაში არსებობს. მე მზად ვარ კითხვებს ვუპასუხო. მაქვს კითხვები იპოთეკასთან, მოუწესრიგებელ ინფრასტრუქტურასთან დაკავშირებით, რომელიც ორი წელია ვერ მოაწესრიგეს. როცა ისინი საუბრობენ ჩვენი პარტიის ცხრაწლიან პერიოდზე, მე მაინტერესებს, აქვს თუ არა პასუხი ჩემს კონკურენტს, „ენერგო პრო-ჯორჯიაში“ მისი მუშაობის ცხრა წლიან პერიოდზე, როცა რამდენიმე თეთრი დავალიანების გამო, მოსახლეობას შუქს უჭრიდნენ“ – აცხადებს რეზო ხარაზი.

 

როზო ხარაზი საუბრობს არჩევნების შემდეგ საკადრო პოლიტიკაზეც:  „თვითმმართველობის ახალი კანონის მიხედვით, გამგებელს უფლება აქვს გაათავისუფლოს და დანიშნოს თანამშრომლები,  მინდა მისგან მოვისმინო, აპირებს თუ არა „ქართული ოცნების“ კანდიდატი გამარჯვების შემთხვევაში გაათავისუფლოს ძველი კადრები და მოიყვანოს მისი პარტიის აქტივისტები კონკურსის გარეშე“.

 

რეზო ხარაძის განცხადებით  კონკურენტი ადმინისტრაციული რესურსითაც სარგებლობს: „საგზაო  დეპარტამენტის ყველა თანამშრომელი, ოცნების აქტივისტებთან ერთად ყოველდღე დარბიან და ასწორებენ გზებს. ჩვენც გვქონდა წინა წლებში მსგავსი პრაქტიკა, მაგრამ არ იმუშავა ამან. მოსახლეობას სჭირდება კონკრეტული პროგრამები და პროექტები“- აცხადებს ის.

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე