Batumelebi | ბავშვზე სქესობრივ ძალადობაში ბრალდებული ბავშვზე სქესობრივ ძალადობაში ბრალდებული – Batumelebi
RU | GE  

ბავშვზე სქესობრივ ძალადობაში ბრალდებული

 

10 წლის გოგონასთან გაუკუღმართებული სქესობრივი კავშირის დამყარებაში ბრალდებულის, 76 წლის მამაკაცის წინასასამართლო სხდომა გაიმართა.  წინასასამართლო სხდომაზე შეიცვალა ბრალდების მუხლი, რაც დაცვის მხარემ გააპროტესტა. ბრალდებულს სისხლის სამართლის კოდექსის მუხლის ის ნაწილი ჰქონდა წარდგენილი, რაც კოდექსიდან ამოღებულია. 

 

 

მოსამართლე დავით მამისეიშვილს პროკურორმა შოთა ხორავამ უთხრა, რომ ტექნიკური ხარვეზის გამო დაკავებულს ბრალდება არასწორად აქვს წარდგენილი, ანუ სისხლის სამართლის 138-ე მუხლის მეხუთე ნაწილის ნაცვლად, მას სსკ-ის 138-ე მუხლის მეოთხე ნაწილით უნდა წარდგენოდა ბრალი (მეხუთე ნაწილი სსკ-დან ამოღებულია). ეს მუხლი სექსუალური ხასიათის ძალმომრეობითი მოქმედების სასჯელის ზომას განსაზღვრავს, დანაშაული კი ჩადენილია 14 წლამდე პირის მიმართ.

 

ტაქსის მძღოლს ასევე ბრალად ედება სსკ-ის 141-ე მუხლით გათვალისწინებული დანაშაულის ჩადენა. ანუ ძალადობის გარეშე გარყვნილი ქმედება დამნაშავისთვის წინასწარი შეცნობით, თექვსმეტი წლის ასაკს მიუღწეველთან, რაც ისჯება თავისუფლების აღკვეთით ვადით ხუთიდან შვიდ წლამდე.

 

მოსამართლე დავით მამისეიშვილმა პროკურორ შოთა ხორავას ყველა შუამდგომლობა დააკმაყოფილა და სასამართლოში წარდგენილი მტკიცებულებები საქმის მასალებს დაურთო. საქმეში ათზე მეტი მოწმეა დასაკითხი, ასევე საქმის მასალებში ინახება ექსპერტიზის დასკვნები, ბრალდებულის ავტომანქანიდან ამოღებული ნივთები…

 

მოსამართლემ სხდომაზე განმარტა, რომ საქმეში არსებული მტკიცებულებებით, ალბათობის მაღალი ხარისხით, ბრალდებულის გამამტყუნებელ განაჩენს გამოუტანენ. ბრალდებულის ადვოკატმა პროკურორის შუამდგომლობა კვალიფიკაციის შეცვლაზე გააპროტესტა. მან ასევე მოსამართლეს უთხრა, რომ ეს საქმე არ უნდა გადაეცეს სასამართლოს განსახილველად, რადგან საკმარისი მტკიცებულებები არ არსებობს იმისა, რომ განსასჯელმა დანაშაული ჩაიდინა.

 

ბრალდებული 76 წლისაა და ტაქსისტად მუშაობდა. მას 10 წლის არასრულწლოვან გოგონასთან, რომელიც მისი მეზობელი იყო, გაუკუღმართებული სქესობრივი კავშირის დამყარება ედება ბრალად.
ბრალის დამტკიცების შემთხვევაში წინასწარპატიმრობაში მყოფს თხუთმეტიდან ოც წლამდე პატიმრობა ემუქრება.

ნეტგაზეთის მასალების სხვა გამოცემებში გადაბეჭდვის წესი
ნათია როყვა