გიორგი ერმაკოვი
„მთლიანად პარტია, კოალიცია და მე, ჩემი მხარდამჭერები, კატეგორიულად ვემიჯნებით ნებისმიერი სახის ძალადობას, რომელიც შეიძლება იყოს განხორციელებული ნებისმიერი მოქალაქის წინააღმდეგ. სამართალდამცავებს კი მოვუწოდებ, რომ დროულად მოახდინონ რეაგირება.“
გიორგი ერმაკოვი ამბობს, რომ თუკი „ნაციონალური მოძრაობის“ ხელმძღვანელებს აქვთ ინფორმაცია ლევან ტეტემაძის ცემასთან დაკავშირებულ დეტალებზე, სამართალდამცავ ორგანოებს უნდა მიმართონ:
„თუ მათ აქვთ დამადასტურებელი ინფორმაცია, რომ ლევან ტეტემაძის ცემასთან მე რაიმე მაკავშირებს და არ მიმართავენ სამართალდამცავ ორგანოებს, ეს იქნება დანაშაული. მათი ვალდებულებაა, არ დამალონ დანაშაულის შესახებ ინფორმაცია. სხვაგვარად, ასეთი სახის განცხადებები ჩაითვლება პროვოკაციად და ცილისწამებად“ – აცხადებს ის.
დღეს ნაციონალური მოძრაობის ლიდერებმა, მათი პარტიის აქტივისტის ლევან ტეტემაძის ცემის ფაქტთან დაკავშირებით კიდევ ერთი განცხადება გააკეთეს და დანაშაული გიორგი ერმაკოვს და მის თანაგუნდელებს დაუკავშირეს.
დღესვე, მოქალაქეებმა დათო ლორიამ და ჯემალ დუაძემ „დემოკრატიული ჩართულობის ცენტრში“ განცხადება გააკეთეს. ეს ის პირები არიან, რომლებიც ბათუმში შვიდ ივნისს ნაციონალური პარტიის ლიდერებს გიგა ბოკერიას, გია ბარამიძეს და გიგი უგულავას ფიზიკურად დაუპირისპირდნენ. მათ მედიასთან განაცხადეს, რომ „ნაციონალური მოძრაობის“ წევრები და აქტივისტები როგორც ტელეფონით, ასევე სოციალური ქსელის მეშვეობით ემუქრებიან:
„არის მუქარის ზარები და შეტყობინებებიც „ფეისბუკზეც“, რომ ჩვენ გაგვისწორდებიან ფიზიკურად და შურს იძიებენ ლევან ტეტემაძის გამო. თუმცა ჩვენ არ ვაპირებთ მივმართოთ პროკურატურას და არც ამჯერად ვაპირებთ სახელების და გვარების დასახელებას. თუ მოხდება რაიმე ინცინდენტი, ჩვენ საკუთარ თავს თვითონვე დავიცავთ“- აცხადებს დათო ლორია.
ჯემალ დუაძე და დათო ლორია არ გამორიცხავენ რომ ლევან ტეტემაძის ფაქტი თავად „ნაციონალების“ მიერ ყოფილიყო დაგეგმილი:
„პროვოკაციის მიზნით შესაძლებელია მათ თვითონ ჩაიდინეს ეს. გარდა ამისა, არც იმას გამოვრიცხავთ, რომ ეს ყოფილიყო პირადი ანგარიშსწორება, რადგან ტეტემაძე კონტროლიორად მუშაობს ბათუმის ავტოტრანსპორტში და შესაძლებელია ვინმე დაჯარიმებულთან მოუვიდა კონფლიქტი“.
დათო ლორია და ჯემალ დუაძე
