საქართველოს პრემიერ-მინისტი ირაკლი ღარიბაშვილი დღეს ბათუმში საარჩევნო კანდიდატებს წარადგენს. ღარიბაშვილმა შეხვედრები აჭარის მაღალმთიანეთიდან დაიწყო. ხულოს მუნიციპალიტეტში მოსახლეობასთან შეხვედრას აჭარის მთავრობის თავმჯდომარე არჩილ ხაბაძე და დასავლეთ საქართველოს მუფთი ჯემალ პაქსაძე ესწრებოდნენ.
როგორც პრემიერ-მინისტრის პრესსამსახურის მიერ გავრცელებულ რელიზშია ნათქვამი მოსახლეობამ მთავრობის მეთურს სტიქიის შედეგად მიყენებული ზარალის ანაზღაურების და ეკომიგრანტების პრობლემის მოგვარების თხოვნით მიმართა. ღარიბაშვილის განცხადებით ზარალი უკვე დათვლილია და თითოეული ოჯახი შესაბამის ანაზღაურებას მიიღებს. რაც შეეხება ეკომიგრანტების პრობლემას, პრემიერის განმარტებით, აღნიშნული პრობლემის მოსაგვარებლად 12 მილიონი ლარი დაიხარჯება.
პრემიერ-მინისტრის ინფორმაციით, მიმდინარე წლის ოქტომბერში პარლამეტი მიიღებს კანონს მთიანი რეგიონების შესახებ.
დღესვე დაგეგმილია პრემიერის შეხვედრა წმინდა ტბელ აბუსერიძის სახელობის სასწავლო უნივერსიტეტის სტუდენტებთან.
რეგიონული ტურნეს დასასრულს ირაკლი ღარიბაშვილი ბათუმში ერას მოედანზე კოალიცია „ქართული ოცნების“ მერობისა და გამგებლობის კანდიდატებს წარადგენს.
