Batumelebi | დაუზუსტებელი სიები-არჩევნებამდე ერთი კვირით ადრე დაუზუსტებელი სიები-არჩევნებამდე ერთი კვირით ადრე – Batumelebi
RU | GE  

დაუზუსტებელი სიები-არჩევნებამდე ერთი კვირით ადრე

 

 

ცესკოს პირველი მაისის მონაცემებით, თვითმმართველობის არჩევნებზე ამომრჩეველთა ერთიან სიაში 3 472 772 მოქალაქეა რეგისტრირებული. ცესკოში აცხადებენ, რომ ამომრჩეველთა ზუსტი სიის შესახებ ინფორმაცია არჩევნებამდე დაიდება. დეტალებთან დაკავშირებით „ბათუმელები“ ცესკოს პრესსპიკერს ეკა აზარაშვილს ესაუბრა.

 

 

 

 

 

ქალბატონო ეკა, წინა არჩევნებთან შედარებით თუ არის ცვლილებები ამომრჩეველთა ერთიან სიაში, გაიზარდა ამომრჩევლის რაოდენობა, თუ შემცირდა?

 

 ზუსტი სია ჯერ არ არის ცნობილი, მონაცემები გვექნება ერთ კვირაში და ამის საფუძველზე ბიულეტენების ბეჭდვაც დაიწყება. ბიულეტენებთან ერთად ამომრჩეველთა სიებიც უნდა დაიბეჭდოს და შემდეგ უბნებს მიეწოდოს.

 

 როგორც იუსტიციის სამინისტრომ განაცხადა, დაახლოებით 60 ათას მოქალაქეს არ გააჩნდა შესაბამისი დოკუმენტაცია არჩევნებში მონაწილეობის მისაღებად, ამ მიმართულებით შეიცვალა რამე, რა ინფორმაციას ფლობთ?

 

 60 ათასი ეს ის ჯგუფია, რომელსაც არ ჰქონდა იურიდიული ძალის მქონე დოკუმენტი, თუმცა როგორც იუსტიციის სამინისტრო ამბობს, 25 000-მა ამომრჩეველმა აიღო ახალი პირადობის დამადასტურებელი დოკუმენტი ამ სამოცი ათასი ამომრჩევლიდან. ვინც არ აიღო, შესაბამისად, ისინი ვერ მიიღებენ არჩევნებში მონაწილეობას, საარჩევნო კანონმდებლობის საფუძველზე.

 

 საპარლამენტო არჩევნებზე მოქალაქეებს შეექმნათ პრობლემები არასწორი დამისამართების გამო. ასევე, იმ მოქალაქეებსაც ჰქონდათ პრობლემა, ვისაც მშენებარე სახლების გამო რეგისტრაცია შეჩერებული ჰქონდათ დროებით. თვითმმართველობის არჩევნებისთვის თუ არის ეს საკითხი მოგვარებული?

 

 დამისამართების საკითხი იუსტიციის სამინისტროს კომპეტენციაა და მოქალაქეებმა მას უნდა მიმართონ. ჩვენ იმ სიებს ვაქვეყნებთ, რომელსაც იუსტიციის სამინისტრო გვაწვდის. თუ სადმე არის დამისამართების პრობლემა, ეს არ არის საარჩევნო ადმინისტრაციის განხილვის თემა.

 

 ხომ არ არის ცვლილება დამატებით სიებთან ან სპეცუბნებთან დაკავშირებით?

 

 დამატებითი სიები არც ადგილობრივი თვითმმართველობის არჩევნებზე იქნება. რაც შეეხება სპეცუბნებს, მათი რაოდენობა შემცირებულია. გამონაკლის შემთხვევებში ოცი სპეცუბანი იქნება ამ არჩევნებისთვის. სხვა რაიმე მნიშვნელოვანი ცვლილება არჩევნებისთვის არ იგეგმება.

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე