Batumelebi | ლევან ვარშალომიძე ახალ მთავრობას უმოქმედობაში ადანაშაულებს ლევან ვარშალომიძე ახალ მთავრობას უმოქმედობაში ადანაშაულებს – Batumelebi
RU | GE  

ლევან ვარშალომიძე ახალ მთავრობას უმოქმედობაში ადანაშაულებს

 

აჭარის მთავრობის ყოფილი თავმჯდომარე ლევან ვარშალომიძე დღეს თამარის დასახლებაში ბარაკებში მცხოვრებ ოჯახებს იმ კორპუსებთან შეხვდა, რომელიც წინა მთავრობამ ეკომიგრანტებისთვის ააშენა. მთავრობას ამ კორპუსებში ეკომიგრანტები ჯერ კიდევ არ შეუსახლებია. „ბინები უკვე განაწილებულია და არ ვურჩევ სააკაშვილის მთავრობას ამ თემით აპელირებას“ – ასე უპასუხა მთავრობის თავმჯდომარემ არჩილ ხაბაძემ ლევან ვარშალომიძეს. 

 

„ეს ორი სახლი არის სიმბოლო იმისა, თუ რას ვაკეთებდით წლების განმავლობაში. გარდა იმისა, რომ ეს ორი სახლი ავაშენეთ, ფულიც დავუტოვეთ ბიუჯეტში იმისთვის, რომ კიდევ ორი სახლი აეშენებინათ. აღარ ვსაუბრობ ახლის აშენებაზე. უკვე აშენებულს ვეღარ იყენებს მთავრობა. ვერ გამოუძებნია დრო, რომ მისცეს გასაღები და შეუშვას. მე გეუბნებით, რომ თქვენ ხართ პრიორიტეტი, თქვენ თუ არ განსაზღვრეთ და თქვენ თუ არ მიიღეთ ის ბინები, რომლებიც დაპირებული იყო, ქალაქის განვითარებას ბოლო მოეღება და ამით მართლა შეიძლება დავბრუნდეთ იმ ძველ პერიოდში. ყველას გვახსოვს სად ვიყავით და როგორ ვიყავით. ამაზე არ უნდა ინერვიულოთ ჩვენ სიტყვა მოგეცით ბოლომდე უნდა შე შვასრულოთ.“ – მიმართა ლევან ვარშალომიძემ ბარაკებში მცხოვრებ მოსახლეობას.

 

„მართალი ხართ სიტყვა მოგვეცით, მაგრამ სახლები აშენდა, ჩვენ კი დავრჩით ნაოცნებარი, ისევ ბარაკებში ვცხოვრობთ“ – ასეთი იყო მოსახლეობის პასუხი.

 

„მთავრობა იქნება თუ მერია, როგორ შეიძლება რომ ადამიანები დაიყოს კატეგორიებად თუ ვის რა როგორ უნდა მისცეს. დავყოთ ახლა შავებად და თეთრებად? – გაჭირვებული ყველა ერთია. ჩვენი გეგმის ნაწილი იყო ის, რომ თქვენ ტერიტორიაზე უნდა აშენებულიყო ოცდაათზე მეტი სახლი, რომ გადათვალო – 2000 ბინა გამოდის. ჯერ კიდევ შარშან შეიძლებოდა ამის გაკეთება. ეს შეიძლებოდა მიგვეცა ყველა გაჭირვებულისთვის და არამარტო ბათუმელისთვის. “ – განაცხადა ლევან ვარშალომიძემ შეხვედრაზე.

 

აჭარის მთავრობის თავმჯდომარის არჩილ ხაბაძის განხადებით თამარის დასახლებაში ორ ახალ კორპუსში, რომლებზეც ლევან ვარშალომიძე საუბრობდა, ბინები უკვე განაწილებულია, ოჯახები ამ ბინებში არჩევნების შემდეგ შესახლდებიან. 

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე