შინაგან საქმეთა სამინისტროს მიერ გავრცელებული ინფორმაციით გამოძიებამ დაადგინა, რომ გურამ ქობულაძე, თანამდებობრივი უფლება-მოვალეობების შესრულებისას, მოქალაქეს დაჰპირდა დაბა ქედაში მდებარე ყოფილი მეფრინველეობის ფაბრიკის ტერიტორიის – 2000 კვ.მ მიწის ნაკვეთის იჯარით გაცემაში დახმარებას, რის სანაცვლოდაც, ქრთამის სახით, მოითხოვა და აიღო 30 000 აშშ დოლარი.
გამოძიება განსაკუთრებით დიდი ოდენობით ქრთამის აღების ფაქტზე მიმდინარეობს (საქართველოს სსკ-ის 338-ე მუხლის მე-3 ნაწილის ,,ე“ ქვეპუნქტით, რაც 11-დან 15 წლამდე თავისუფლების აღკვეთას ითვალისწინებს). გამოძიებას საქართველოს შინაგან საქმეთა სამინისტროს ანტიკორუფციული სააგენტო აწარმოებს.
გურამ ქობულაძე ქედის მუნიციპალიტეტის საკრებულოში „ერთიანი ნაციონალური მოძრაობის“ კვოტით შევიდა, 2012 წლის საპარლამენტო არჩევნების შემდეგ კი მან საკრებულოს „ნაციონალური მოძრაობის“ ფრაქცია დატოვა და საკრებულოში დამოუკიდებელ წევრად მუშაობდა. 2013 წლის სექტემბრიდან ის საკრებულოს თავმჯდომარის მოადგილედ აირჩიეს.
