ისინი ხელისუფლებას მოთხოვნით მიმართავენ: პირველი მაისი გამოცხადდეს უქმე დღედ და შეიქმნას მშრომელთა საინსპექციო ჯგუფი, რომელიც დაიცავს ფაბრიკა ქარხნებში მომუშავე პირთა უფლებებს – “ჩვენ სოლიდარობას ვუცხადებთ ამ ადამიანებს, ჩვენი უკეთესი მომავლისათვის აუცილებელია დავიწყოთ ფიქრი სად გვაქვს პრობლემა, როგორ მოქმედებს 2013 წელს მიღებული შრომითი კოდექსი, როგორ შრომით ხელშეკრულებებს უდებენ ფაბრიკა ქარხნებში, მშენებლობებზე მომუშავე პირებს, სად არის ყველაზე მეტი დარღვევა შრომის უფლებების. გვინდა რომ ეს დროთა განმავლობაში აუცილებლად გამოსწორდეს. ამისათვის სტუდენტებმა და ახალგაზრდებმა აქტიურად უნდა ჩავერთოთ. ყოველ ნაბიჯზე არასამართლიან ქმედებებს ვხვდებით. ჩვენ ვიყავით ფაბრიკა ქარხნებში, გავესაუბრეთ იქ მომუშავეებს. მათ მინიმალური ანაზღაურების 150-200 ლარის დაკარგვის შიშით ისინი უარს ამბობენ ხმამაღლა თქვან თუ რა შრომით პირობებში იმყოფებიან, ის რომ რვა საათის ნაცვლად 12 საათს მუშაობენ, რა ხელშეკრულებაზე აქვთ ხელი მოწერილი. ჩვენ ასეთი ინფორმაციაც მივიღეთ, რომ გარკვეულ შემთხვევებში საპირფარეშოს უკეტავენ რომ ზედმეტი დრო არ დახარჯონ“- ამბობს აქციის ერთ-ერთი მონაწილე თამარ ბაუჟაძე.
სტუდენტებმა უნივერსიტეტის ეზოდან ჭავჭავაძის ქუჩაზე მდებარე სამკერვალო ფაბრიკასთან გადაინაცვლეს და მხარდამჭერი აქცია იქაც გამართეს – „აქ მომუშავეების ხელფასი საარსებო მინიმუმს არ უტოლდება. ჩვენ გვინდა მათ იცოდნენ, რომ სტუდენტები საკუთარი უფლებების დასაცავად მხარში ვუდგავართ და არ შეეშინდეთ ექსპლუატაციის წინააღმდეგ ბრძოლა“- ამბობს სტუდენტური მოძრაობა „ალტერნატივის“ ხელმძღვანელი გოჩა სურგულაძე.
