Batumelebi | ხუთი კვერცხი და ერთი პასკა სოციალურად დაუცველებისთვის ხუთი კვერცხი და ერთი პასკა სოციალურად დაუცველებისთვის – Batumelebi
RU | GE  

ხუთი კვერცხი და ერთი პასკა სოციალურად დაუცველებისთვის

 

ბათუმის მუნიციპალური სასადილოების ხელმძღვანელობამ, აღდგომის დღესასწაულთან დაკავშირებით, სოციალურად დაუცველი პირებისთვის 10 ათას ლარამდე ღირებულების კვერცხი და პასკა შეისყიდა. სააღდგომო საჩუქარს უფასო სასადილოს 2221 ბენეფიციარი მიიღებს

 

 

 

სააღდგომო კვერცხების შესაძენად, ა(ა)იპ „ბათუმის მუნიციპალურმა სასადილომ“ ტენდერი კვერცხის შესყიდვაზე პირველ აპრილის გამოაცხადა. ტენდერში სამმა დაინტერესებულმა პირმა მიიღო მონაწილეობა. ესენი იყვნენ შპს „მეგა +“, შპს „ბიზნეს ჯგუფი“ და ინდმეწარმე გურამ დუმბაძე. როგორც „მუნიციპალური სასადილოს“ ხელმძღვანელი ბადრი გოგიძე „ბათუმელებთან“ საუბარში აცხადებს, ყველა დაბალი ფასი, (ერთი ცალი კვერცხი 27 თეთრი) ინდმეწარმე გურამ დუმბაძემ შესთავაზათ:

 

 

„თუმცა მან ვერ შეძლო სატენდერო ვადებში კვერცხის მოწოდება. ამიტომ, ჩვენ გავაუქმეთ ტენდერი და კვერცხი გურამ დუმბაძისგან, პირდაპირი მიყიდვის წესით შევისყიდეთ“-აცხადებს სასადილოს ხელმძღვანელი.

 

 

სააღდგომო პასკა სასადილომ შპს „ვ.ტ“-სგან, 6 640 ლარად იყიდა. კვერცხში კი 2 998 ლარი გადაიხადეს.

 

 

„რადგან დღესასწაულია გვინდოდა ამ ფორმით გაგვეკეთებინა მათთვის საჩუქარი. ბენეფიციარები ერთ ცალ 800 გრამიან პასკას და ხუთ კვერცხ მიიღებენ. სამ კვერცხს უმი სახით, ორ ცალს კი მოვუხარშავთ და ისე დავურიგებთ“-ამბობს ბადრი გოგიძე.

 

 

ბათუმში ხუთი მუნიციპალური სასადილო ფუნქციონირებს. სასადილოებით 2221 სოციალურად დაუცველი პირი სარგებლობს.

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე