როგორც იაზგულ მჟავანაძე აცხადებს, მისი შვილი, მამუკა გოგიტიძე, 6 წელია სასჯელს იხდის. პატიმრის დედის თქმით, მის შვილს დანაშაული არ ჩაუდენია და იგი ყოფილი ხელისუფლების პოლიტიკის მსხვერპლი გახდა.
„ჩემი უფროსი შვილი ასლან აბაშიძის პირად დაცვაში მუშაობდა. როდესაც ახალი მთავრობა მოვიდა, ვინც გოგიტიძე იყო, აღარც სამსახური ჰქონდა და არც არაფერი. 2005-ში წავიდა ევროპაში, წაიყვანა თავისი უმცროსი ძმაც. ბელგიაში მიიღო პოლიტიკური თავშესაფარი. პატარა შვილი ჰყავდა, ვერ გაუძლო და დაბრუნდა საქართველოში. დაბრუნებიდან მალე ჩემს შვილებს ადამიანის გატაცება დააბრალეს. ორივე ძმა გაიქცა, უფროსი რუსეთში დაიღუპა, უმცროსი კი, დააპატიმრეს. დაპატიმრებიდან ერთი წლის შემდეგ საქართველოს ციხეში გადმოიყვანეს. ჩემს შვილს დღემდე არ უღიარებია დანაშაული. ახლა მძიმე მდგომარეობაშია გეგუთის ციხეში. ცე ჰეპატიტი აქვს და ცეროზის ნიშნები. ექსპერტის დასკვნა მაქვს,“ – აცხადებს იაზგულ მჟავანაძე.
პატიმრის დედის განცხადებით, მის შვილს, კანონით, შეწყალება ჯერ არ ეკუთვნის.
„ვადაზე ადრე გათავისუფლების მოთხოვნა ოქტომბერში შეუძლია, მაგრამ ოქტომბრამდე ეს სიტუაცია ისე გართულდება, შეიძლება ცოცხალიც ვეღარ გამოვიდეს. აქამდე თუკი პატიმარს აღიარება არ ჰქონდა დანაშაულის, არ აძლევდნენ შეწყალებას. ახალი დადგენილებით თუ პატიმარს არ აქვს დანაშაული აღიარებული, მაინც ეძლევა შეწყალება. ვთხოვ პრეზიდენტს, ეს მდგომარეობა გაითვალისწინოს და ჩემი შვილი შეიწყალოს,“ – აცხადებს იაზგულ მჟავანაძე.
