Batumelebi | „მეოთხე არხი“ – ახალი ტელევიზია 4 აპრილიდან „მეოთხე არხი“ – ახალი ტელევიზია 4 აპრილიდან – Batumelebi
RU | GE  

„მეოთხე არხი“ – ახალი ტელევიზია 4 აპრილიდან

 

ბათუმში 4 აპრილიდან კიდევ ერთი თანამგზავრული ტელევიზია – „მეოთხე არხი“ იწყებს მაუწყებლობას. როგორც ტელევიზიის დირექტორმა რამაზ ურუშაძემ „ბათუმელებთან“ თქვა, ახალი ტელევიზია სარეკლამო კომპანია „ნიუ მედია აჭარას“ ბაზაზე შეიქმნა. ამ ბიზნესში რამაზ ურუშაძის მეწილეები ლევან კალანდია და მურთაზ ფრანგულაშვილი არიან. ახალ ტელევიზიასთან დაკავშირებულ გეგმებზე „ბათუმელებს“ რამაზ ურუშაძე ესაუბრა.

 

 

რამაზ, 4 აპრილს რომ გადართავს მაყურებელი ტელევიზორს თქვენს არხზე, რა გადაცემებს ნახავს?

 

 

ვართ საერთო მაუწყებელი, რაც იმას ნიშნავს, რომ ვალდებულება გვაქვს მინიმუმ ორი ტიპის გადაცემა, – საინფორმაციო გამოშვება და საზოგადოებრივ-პოლიტიკური მაინც გავაკეთოთ. პრიორიტეტი იქნება ტურიზმი, ამიტომ აუცილებლად გვექნება ამაზე გადაცემა. იქნება საუბარი პრობლემებზეც და რესურსებზეც, ასევე, გადაცემა კულტურულ მემკვიდრეობაზე. პირველ ეტაპზე აჭარა იქნება წარმოჩენილი ქართული ბაზრისთვის. 

 

 

რამდენი ჟურნალისტი და წამყვანი გყავთ და რეგიონული ბიუროები თუ გექნებათ?  

 

 

ამ ეტაპზე გვყავს ხუთი ჟურნალისტი, ვაპირებთ საინფორმაციოში ავიყვანოთ სამი სტაჟიორი. საინფორმაციო სამსახურის უფროსი ეკა ლორთქიფანიძე იქნება. პოლიტიკურ თოქ-შოუს კვირაში ორჯერ წაიყვანს ნათია კირცხალია. საინფორმაციო გამოშვებები გავა დღეში ორჯერ, ხუთ საათზე და ცხრის ნახევარზე. როგორც ვიცი, ამ დროში აქვთ საინფორმაციო გამოშვებები 25-არხს და „აჭარის ტელევიზიასაც“. ეს ერთგვარი გამოწვევაცაა ამ ტელევიზიების, მაგრამ ჯანსაღი კონკურენციაა და ვფიქრობ, მარკეტინგულადაც სწორია.  

 

 

 

დასაწყისისთვის რა თანხა ჩაიდო ტელევიზიის ფუნქციონირებისთვის? სპეციალისტების გათვლებით, სულ მცირე მილიონი ლარი მაინცაა საჭირო, რომ ტელევიზიამ ფუნქციონირება დაიწყოს..

 

 

ციფრებზე საუბარი არ მიყვარს, თუმცა, ეს ციფრებიც ხშირ შემთხვევაში გადაჭარბებულია. ზოგადად ძნელია ამაზე საუბარი, მაგრამ ერთ პატარა ტელევიზიას მილიონი ლარი არ სჭირდება. ჩვენ წლების განმავლობაში ვიყავით სარეკლამო ბაზარზე და ვიცით, რა მოცულობის თანხები ტრიალებს.  

 

 

საქართველოში არსებობს იმის პრაქტიკა, რომ ტელევიზიები ექცევიან პოლიტიკური ფიგურების ან გარკვეული ჯგუფების ხელში, ფინანსური გარანტიების მიღების სანაცვლოდ. ალბათ თქვენც გაიგებდით, რომ თითქოს მეოთხე არხის ფინანსურ მხარდაჭერას ლევან ვარშალომიძე უზრუნველყოფს, არის თუ არა ეს სიმართლე?

 

 

ყოველთვის ვიყავი და ვარ წინააღმდეგი, რომ მედია იყოს პოლიტიკური იარაღი რომელიმე პოლიტიკური დაჯგუფების ხელში. ჩვენ ყველა გონივრულ რესურსს გამოვიყენებთ, რომ ტელევიზია გამოვიდეს კარგი. ლევან ვარშალომიძესთან არ გვაქვს არანაირი გადაკვეთის გზები. მეც მომისმენია ვარშალომიძეზე, იყო საუბარი ბერა ივანიშვილზეც, თითქოს GDშ-ისგან მივიღეთ ლიცენზია. ისიც კი არ იციან, რომ ლიცენზიას მარეგულირებელი ორგანო გასცემს. ასეთ ინფორმაციებს მედია ავრცელებს, თუმცა საფუძველი არ ვიცი. ჩვენც მზად ვიყავით ამ ტიპის ინფორმაციების მოსასმენად. თუ არსებობს მიზანი და სწორი სტრატეგია, ყველაფერი მიღწევადია.

 

 

ტელევიზიის შექმნას საკმაოდ დიდი ფინანსური რესურსი სჭირდება. ამ სფეროს სპეციალისტების მტკიცებით საქართველოში სარეკლამო ბაზარი იმდენად მწირია, რომ მხოლოდ ორი ტელევიზიის შენახვა თუ შეიძლება რეკლამის ხარჯზე. არსებული კონკურენციის პირობებში რეკლამის მოძიება განსაკუთრებით რთული იქნება, მით უფრო რეგიონშიამ კუთხით რა გეგმები გაქვთ?

 

 

 ჩვენ ვიყავით სარეკლამო სატელევიზიო სტუდია „ნიუ მედია აჭარა“, რომელმაც მიიღო ლიცენზია. ეს არის ტელევიზიის ძირი. დიდი ხანია ვართ ერთ-ერთი დიდი მოთამაშე სარეკლამო ბაზარზე და თავიდანვე გვქონდა მიზანი, რომ ეს ყველაფერი მიგვეყვანა ტელევიზიამდე, ამიტომ ეტაპობრივად ხდებოდა მატერიალურ-ტექნიკური ბაზის შეძენა. ტელევიზიის ძირითადი კაპიტალი არის „ნიუ მედია აჭარა“.

 

 

 სარეკლამო ბაზრიდან რამდენი პროცენტის წამოღების იმედი გაქვთ?

 

 

ამ ეტაპზე არაფერი არ შემოგვდის, რადგან საცდელი მაუწყებლობით ვართ ეთერში. თუმცა სტრატეგიები და მოლოდინები გვაქვს. ჩვენი პროგნოზით სარეკლამო ბაზრის 75 პროცენტს წამოვიღებთ. ეს უზრუნველყოფს იმას, რომ ნორმალურად ვიარსებოთ.

 

 

თანამშრომლები კონტრაქტის საფუძველზე გყავთ აყვანილი, თუ ჯერ ენთუზიამზე მოუწევთ მუშაობა?

 

ეთერში გასვლიდან დიდი ნაწილი აიღებს ხელფასს. ეთერში ვიქნებით მინიმუმ ექვსი საათი, თუმცა გვინდა უფრო დიდხანს ვიყოთ.  

 

 

კანონი ტელევიზიას ლიცენზირებული პროდუქციის შესყიდვას ავალდებულებს  ფილმები, მუსიკაამ მიმართულებით არსებული სირთულეები უკვე მოაგვარეთ

 

 

საავტორო და მომიჯნავე უფლებების დაცვით გავა ყველა პროდუქცია. ჩვენ წინსწრებით ვემზადებოდით ამ პროცესისთვის, დიდი ნაწილი ჩვენ თვითონ გადავიღეთ ბათუმთან, რეგიონთან დაკავშირებით, ამიტომ რაღაც ნაწილი პროდუქციის იქნება ჩვენი, რასაც ეტაპობრივად ჩავუშვებთ ეთერში.

 

 

რომელ სატელიტზე ხართ და რა ღირს სატელიტის მომსახურების ხარჯები ახალი ტელევიზიისთვის?

 

 

ორ კომპანიასთან – „მაგთისატთან“ და „ივერია სატთან“ გვაქვს მოლაპარაკება. ალბათ „მაგთისატთან“ ვითანამშრომლებთ. რაც შეეხება სატელიტის მომსახურების ხარჯებს, სხვადასხვა ფასი არსებობს, ჩვენთვის მთავარია, რეგიონი ავითვისოთ.  

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე