Batumelebi | ქართველი მეზღვაურები ერთი თვის ანაზღაურებას და საგარანტიო წერილს მიიღებენ ქართველი მეზღვაურები ერთი თვის ანაზღაურებას და საგარანტიო წერილს მიიღებენ – Batumelebi
RU | GE  

ქართველი მეზღვაურები ერთი თვის ანაზღაურებას და საგარანტიო წერილს მიიღებენ

 

„მეზღვაურები საქართველოში დღეს ან ხვალ დაბრუნდებიან. დღეს კი მათი ოჯახები ერთი თვის ანაზღაურებას მიიღებენ, ასეთია შეთანხმება“ – ამის შესახებ საზღვაო ტრანსპორტის სააგენტოს დირექტორმა, მამუკა ახალაძემ განაცხადა.  

 

 

ოთხი თვეა ქართველი მეზღვაურები მიტოვებულები არიან თურქეთში გემთმფლობელის მიერ. მათ გუშინ საქართველოს მთავრობას სთხოვეს დახმარებას. მეზღვაურების ინფორმაციით, ისინი გემზე ოთხი თვეა ანაზღაურების გარეშე არიან. 

 

 

„მეზღაურებმა ხელშეკრულებას ბათუმში მოაწერეს ხელი რაულ ფარტენაძის დახმარებით. ველაპარაკე ამ ადამიანს, მითხრა, რომ დღეს დაურიგებს ერთი თვის ხელფასებს მეზღვაურების ოჯახებს, ხოლო მეზღვაურებს მისცემენ საგარანტიო წერილს, რომ გემი გაიყიდება და ამის შემდეგ ისინი მიიღებენ დარჩენილ თანხას. დღეს ველაპარაკე მეზღვაურებს,  ისინი თანახმა არიან ამაზე და სავარაუდოდ დღეს ან ხვალ წამოვლენ სახლში,“ განაცხადა მამუკა ახალაძემ.

 

კითხვაზე, რამდენად სანდოა საგარანტიო წერილი, საზღვაო სატრანსპორტო სააგენტოს დირექტორი ამბობს, რომ მათ არ შეუძლიათ რაიმე გარანტიის მიცემა ამ თემაზე, რადგან ეს მათი კომპეტენციის ფარგლებს ცდება.

 

„საქმე გვაქვს მეზღვაურების მოტყუებასთან, ეს არის მორიგი აფიორა. სამომავლოდ ჩვენ ვაპირებთ მექანიზმები შევქმნათ, რომ ქართველ მეზღვაურები მსგავს სიტუაციაში არ აღმოჩნდნენ. ყველა მეზღვაურს მოვუწოდებ, ვიდრე დასაქმდებიან საეჭვო კომპანიების მფლობელობაში არსებულ გემებზე, დარეკონ ჩვენთან ცხელ ხაზზე, ან მოვიდნენ და გვაჩვენონ კონტრაქტი, ჩვენ მათ აბსოლუტურად უფასოდ გავუწევთ იურიდიულ და სხვა ტიპის კონსულტაციას.“ – ამბობს მამუკა ახალაძე.

 

 

ნეტგაზეთის მასალების სხვა გამოცემებში გადაბეჭდვის წესი
ნანა კვაჭაძე