საქმე ეხება სიტყვიერ შეთანხმებას, რომელიც ხულოს მუნიციპალიტეტის ხუთი სოფლის მოსახლეობასა და აჭარის ხელისუფლებას შორის შედგა და რომელმაც დოკუმეტის სახე უნდა მიიღოს.
ზემოთ ჩამოთვლილი მოთხოვნები, რომელიც მემორანდუმში უნდა შევიდეს, დემოკრატიის ინსტიტუტის ხელმძღვანელმა, გენო გელაძემ ადგილობრივებს გააცნო. 5 სოფლის მცხოვრებთაგან დაკომპლექტებულ საინიციატივო ჯგუფის წარმომადგენლებს არ მოსწონთ ის იდეა, რომ პასუხისმგებლობას მხოლოდ ხელისუფლება იღებს. „თუ სახლი დამენგრევა ან მე მეწყერის გამო რამე მომივა, მინდა ანგარიშზე იყოს თანხა, რომელსაც ჩემი შვილი მოიხმარს“, – განაცხადა შეხვედრის ერთ-ერთმა მონაწილემ. მოსახლეობა საგარანტიო პირობად კომპანიის ანგარიშზე გარკვეული თანხის შენახვას ითხოვს. მოქალაქეები თანხის ზუსტ რაოდენობაზე ვერ საუბრობენ.
აჭარის მთავრობის იურიდიული დეპარტამენტის ხელმძღვანელის, პარმენ ჯალაღონიას განმარტებით, ”აჭარის მთავრობა იღებს ვალდებულებას, დაზარალებული ოჯახები საჭიროების შემთხვევაში მიიღებენ საცხოვრებელ ფართს აჭარის ტერიტორიაზე. მემორანდუმი გაფორმდება მას შემდეგ, რაც მოსახლეობა მათ პირობებს და ინიციატივებს წერილობით წარმოადგენს.”
საინიციატივო ჯგუფის გარკვეული ნაწილი ადგილობრივებისთვის უფასო ელექტრო ენერგიის მიწოდებას ითხოვს, ჰესის მშენებლობის დარსულების შემდეგ.
მოსახლეობა ითხოვს მოსავლიანობის შემცირების საკითხზე გამოკვლევასაც. მონიტორინგი უნდა ჩატარდეს, თუ რამდენად შემცირდება მოსავლიანობა და ამით რა ზარალი მიადგება მათ. ადგილობრივები 8 მარტს მათი სოფლის ქალების შეურაცხყოფის ფაქტის გამოძიებას მოითხოვენ. მოსახლეობა ამბობს, რომ პოლიცია ხალხს, მათ შორის ქალებს ფიზიკურად გაუსწორდა. სახალხო დამცველის აპარატის წარმომადგენელმა აჭარაში, გიორგი ჩარკვიანმა მოსახლეობას ამ ფაქტებზე რეაგირებისთვის ფოტო მასალა მოსთხოვა.
არასამთავრობო ორგანიზაციის დემოკრატიის ინსტიტუტის ხელმძღვანელის გენო გელაძის განმარტებით, შეხვედრა წარმატებით შედგა. ისინი ელოდებიან ერთი კვირის განმავლობაში მოსახლეობის ინიციატივებს და სამივე მხარე მემორანდუმს ხელს შემდეგ მოაწერს.
„პირობები, რომელიც წარმოგვიდგინეს, ჩვენ ამ შემოთავზებებს გავაცნობთ მთლიან მოსახლეობას და შემდეგ ვიმსჯელებთ მემორანდუმში შესატან ცვლილებებზე. შემდეგ შეხვედრაზე ჩვენს ინიციატივებს წარვუდგენთ მათ. სოფელში კომპანია გვირაბის მშენებლობას მანამ ვერ დაიწყებს, სანამ საბოლო შეთანხმებას არ მივაღწევთ: ჩვენ ამის საშვალებას არ მივცემთ”, – განმარტა სოფლის მკვიდრმა ოთარ იაკობაძემ.
„დიალოგი შედგა. ძალიან ბევრი საკითხი იყო, რაზეც ჩვენ ვიმსჯელეთ, ჩვენი კომპანია დიალოგს მხარს უჭერს. ყველა საკითხი, რომელიც მოსახლეობას აწუხებს, ადგილობრივ მთავრობასთან ერთად, შევეცდებით მათ შესრულებას”, – განმარტა აჭარის მთაში ჰესების მშენებელი კომპანიის „აჭარისწყალი ჯორჯიას“ წარმომადგენელმა ზვიად დიასამიძემ.
შეგახსენებთ, 8 მარტს ღურტელებმა სოფელში არ შეუშვეს აჭარის ხელისუფლების წარმომადგენლები, რისთვისაც ისინი, როგორც თვითონ ამბობენ, პოლიციამ სცემა.
