Batumelebi | ტურისტული ბიზნესის განვითარების მსურველებს კონსულტანტები დაეხმარებიან ტურისტული ბიზნესის განვითარების მსურველებს კონსულტანტები დაეხმარებიან – Batumelebi
RU | GE  

ტურისტული ბიზნესის განვითარების მსურველებს კონსულტანტები დაეხმარებიან

 

დღეიდან, საოჯახო სასტუმროების განვითარების მსურველებს აგროსერვის ცენტრის საინფორმაციო-საკონსულტაციო სამსახურების ფინანსისტები უფასოდ გაუწევენ კონსულტაციებს ბიზნესის გასაუმჯობესებლად. დღეს დასრულდა ტრენინგი თემაზე „ტურიზმი სოფლად და პატარა ქალაქებში“, რომლის ფარგლებშიც ისინი სოფლად აგროტურიზმის განვითარების საკითხებში გადამზადდნენ.  

 

ტრენინგები აჭარის ტურიზმისა და კურორტების დეპარტამენტში ერთი კვირის განმავლობაში მიმდინარეობდა, რომლის ფარგლებშიც მონაწილეებმა შეისწავლეს თუ როგორ დაეხმარონ საოჯახო სასტუმროების მეპატრონეებს  ბიზნესის სტრატეგიულად დაგეგმვასა და განვითარებაში და რა მინიმალურ და მაქსიმალურ სტანდარტებს უნდა აკმაყოფილებდეს საოჯახო სასტუმროები.

 აგროსერვის ცენტრის კონსულტანტებმა ტრენინგის ფარგლებში  საოჯახო სასტუმრო სახლები მოინახულეს სოფელ გობრონეთსა და გომარდულში. სპეციალისტებმა იქ არსებული მდგომარეობა შეაფასეს და რეკომენდაციები მოამზადეს არსებული სიტუაციის გაუმჯობესების მიზნით. ხვალიდან კი კონსულტაციებისა და რეკომენდაციების მსურველებს აგროსერვის ცენტრის კონსულტანტებთან დაკავშირება აჭარის რეგიონის ყველა მუნიციპალიტეტში შეეძლებათ.

ტრენინგები აჭარის   ტურიზმისა და კურორტების დეპარტამენტისა მხარდაჭერით „ENPARD Ajara- სოფლის  მეურნეობის ხელშეწყობა აჭარის ავტონომიურ რესპუბლიკაში” პროგრამის  ფარგლებში ხორციელდებოდა და მისი მიზანი რეგიონში, სოფლად ტურიზმის განვითარების ხელშეწყობაა. 

 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"