თბილისში, შინაგან საქმეთა სამინისტროს ანტიკორუფციულ სააგენტოში (დეპარტამენტი), ბათუმის საკრებულოს წევრები და იურისტი დაკითხვაზე დაიბარეს. „ბათუმელებს“ ეს ინფორმაცია შინაგან საქმეთა სამინისტროში დაუდასტურეს, თუმცა ძალოვან უწყებაში ამბობენ, რომ გამოძიების ინტერესებიდან გამომდინარე არ დააკონკრეტებენ, რა საქმესთან დაკავშირებით დაიბარეს თბილისში საკრებულოს წევრები.
„ბათუმელების“ ინფორმაციით, დაკითხვაზე იმყოფებოდნენ მიწის ნაკვეთებზე საკუთრების უფლების აღიარების უფლებამოსილების განმახორციელებელი მუდმივმოქმედი კომისიის წევრები. კითხვები მათ იმ მიწების შესახებ დაუსვეს, რომელიც კომისიამ 2013 წელს მოქალაქეებს გადასცა საკუთრებაში.
კომისიის თავმჯდომარე, საკრებულოს წევრი მამული ჟღენტი ამბობს, რომ ის საგამოძიებო უწყებას დაკითხვაზე არ დაუბარებია. კიდევ ერთი დეპუტატი, გენო თებიძე კი ადასტურებს, რომ თბილისში, შინაგან საქმეთა სამინისტროში, ის მოწმის სტატუსით დაკითხეს.
გენო თებიძის თქმით, კითხვები, რომლებიც მას დაუსვეს შს სამინისტროში, კონფიდენციალურია და ამ თემაზე კომენტარს ვერ გააკეთებს.
