Batumelebi | რას მოუტანს აჭარის ბიუჯეტს ფრინველებზე დაკვირვება რას მოუტანს აჭარის ბიუჯეტს ფრინველებზე დაკვირვება – Batumelebi
RU | GE  

რას მოუტანს აჭარის ბიუჯეტს ფრინველებზე დაკვირვება

 

ფრინველებზე დაკვირვების მიზნით აჭარის რეგიონს გასულ წელს 113 უცხოელი სტუმარი ეწვია. სათვალთვალო პუნქტებთან განლაგებულ სოფლის სასტუმრო სახლებში „ბერდვოტჩინგის“ მოყვარულებმა ჯამში 1010 ღამე გაათიეს. 2012 წელს იმავე მიზნით აჭარას მხოლოდ 36 ტურისტი სტუმრობდა. სასტუმრო სახლების შესაბამისად მხოლოდ 493 ღამეს იყო დატვირთული. 

 

აჭარის ტურიზმისა და კურორტების დეპარტამენტის ინფორმაციით, სოფლებში – სახალვაშოსა და ჩაისუბანში განთავსებულ სასტუმროებში უცხოელ სტუმრებს 44 390 ლარის მომსახურება გაუწიეს, სხვა ხარჯებმა 13 560 ლარი შეადგინა, საბოლოო შემოსავალმა კი – 57 950 ლარი.

 

2012 წელს სოფლის სასტუმროებში შემოსული თანხა 20 105 ლარი იყო, სხვა ხარჯები – 4 320 ლარი, მთლიანი შემოსავალი კი – 24 425 ლარი.

 

აჭარის ტურიზმის დეპარტამენტის ინფორმაციით, მონახულების რაოდენობის მიხედვით ეკოტურისტებისთვის ყველაზე პოპულარული ადგილებია შუამთის ფრინველებზე დაკვირვების პლაცდარმი, სახალვაშოს ფრინველებზე დაკვირვების წერტილი, ბათუმის ბოტანიკური ბაღი, მტირალას ნაციონალური პარკი, ჭოროხის დელტა, ბათუმის ბულვარი და ზღვისპირა პარკი.

 

აჭარის ტურიზმისა და კურორტების დეპარტამენტმა ფრინველებზე დაკვირვების ტურიზმის განვითარების ხელშესაწყობად 2012 წელს 28 178 ლარი დახარჯა, ხოლო 2013 წელს – 15 320 ლარი. დეპარტამენტში მიიჩნევენ, რომ  „გაწეული ხარჯები და ზემოაღნიშნული შემოსავლები ადასტურებს ფრინველებზე დაკვირვების ტურიზმის გრძელვადიან პერსპექტივაზე დამყარებული სტრატეგიის მართებულობას. ტურიზმის აღნიშნულ სახეობას აჭარაში პოტენციალი აქვს.“

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე