Batumelebi | 471-ათასიანი ტენდერი საქალაქო ავტობუსების ნაწილების შესაძენად 471-ათასიანი ტენდერი საქალაქო ავტობუსების ნაწილების შესაძენად – Batumelebi
RU | GE  

471-ათასიანი ტენდერი საქალაქო ავტობუსების ნაწილების შესაძენად

 

დღეს დაიწყო წინადადებების მიღება „ბათუმის ავტოტრანსპორტის“ მიერ გამოცხადებულ ტენდერში მონაწილეობის მისაღებად. Zonda bus-ის მარკის ავტობუსის სათადარიგო ნაწილებისა და აქსესუარების შესყიდვის სავარაუდო ფასი 471 ათასი ლარია. ელექტრონული ტენდერი ხუთ დღეში დასრულდება.

 

სატრანსპორტო საშუალებების სათადარიგო ნაწილებისა და აქსესუარების მიწოდება ტენდერში გამარჯვებულმა უნდა განახორციელოს ხელშეკრულების გაფორმებიდან არაუგვიანეს ას ოცი დღის განმავლობაში. ამასთან, მიმწოდებელი უნდა იყოს გარანტი იმისა, რომ მის მიერ მიწოდებული საქონელი, სატრანსპორტო საშუალებების სწორი ექსპლუატაციის პირობებში, არ გამოავლენს რაიმე დეფექტს, ხოლო ასეთი დეფექტის გამოვლენის შემთხვევაში მიმწოდებელი უზრუნველყოფს წუნდებული (უხარისხო) საქონლის შეცვლას და განახორციელებს შეცვლასთან დაკავშირებულ ყველა მოქმედებას საკუთარი ძალებითა და საშუალებებით.

სატენდერო პირობის თანახმად, ყოველი შემოთავაზებული სათადარიგო ნაწილი ხარისხით სრულად უნდა შეესაბამებოდეს ორიგინალური დეტალების მონაცემებს. მინიმალური საგარანტიო ვადებია: აგრეგატებზე – ერთი წელი; კვანძებსა და დეტალებზე – ექვსი თვე.

 

 „ბათუმის ავტოტრანსპორტი“ ხელშეკრულების საბოლოო ვარიანტს გამარჯვებულთან შემდგომში დააზუსტებს. ბათუმში საქალაქო ტრანსპორტი მძღოლების გაფიცვის გამო ერთ კვირაზე მეტია არ მოძრაობს. მძღოლების მთავარი მოთხოვნა დაკმაყოფილდა – „ბათუმის ავტოტრანსპორტის“ დირექტორმა დღეს თანმდებობა დატოვა.

 კომპანიის მონაცემებით მის მფლობელობაშია ავტობუსები: ზონდა _ 101 ერთეული, ბოგდანი – 20 და ფავი 21 ერთეული. რაც შეეხება სამარშრუტო ქსელს, არის 15 საქალაქო და 6 საგარეუბნო. კომპანიაში 483 ადამიანია დასაქმებული (აქედან 322 მძღოლი და 45 კონტროლიორი).

შპს „ბათუმის ავტოტრანსპორტი“ 2004 წელსაა დარეგისტრირებული და მისი 100 პროცენტი წილის მფლობელი ქალაქ ბათუმის მერიაა.

 

 

ნეტგაზეთის მასალების სხვა გამოცემებში გადაბეჭდვის წესი
თედო ჯორბენაძე