მოქალაქე, ვინც პატრულს სასამართლოში უჩივლა, დავით ოქროპილაშვილია. ის ამერიკის მოქალაქეა. ბათუმის კარიბჭესთან, გასული წლის ზაფხულში მომხდარი ავტოსაგზაო შემთხვდვის გამო იგი პატრულმა 250 ლარით დააჯარიმა. საქმეს მოსამართლე ლაშა თავართქილაძე განიხილავს.
“ჩვენ წარმოვადგინეთ დამოუკიდებელი ექსპერტიზის დასკვნა, რაც ადასტურებს იმას, რომ ავარია დავით ოქროპილაშვილის მიზეზით არ მომხდარა”, – უთხრა მოსამართლეს ტოგო ჭელიძემ. ის სასამართლოში დავით ოქროპილაშვილის ინტერესებს იცავს.
“ჩვენც წარმოვადგინეთ ექსპერტიზის დასკვნა, რომელიც საექსპერტო-კრიმინალისტიკურმა სამსახურმა მოამზადა,” – მიმართა მოსამართლეს ზურაბ გვარიშვილმა, საპატრულო პოლიციის წარმომადგენელმა. მან ასევე ითხოვა საქმეში მესამე პირად ჩაერთოს გიორგი კონცელიძე, ვინც ავტოავარიის მონაწილე მეორე მხარეა.
მოსამართლემ საპატრულო პოლიციის წარმომადგენლის შუამდგომლობა დააკმაყოფილა და საქმის განხილვა გადაიდო, რადგან “თუკი სასამართლო დაადგენს, რომ ავარია ოქროპილაშვილის გამო არ მომხდარა, მაშინ საპატრულო პოლიცია მეორე მხარეს დააჯარიმებს,” – დასძინა მოსამართლემ.
ტოგო ჭელიძემ “ბათუმელებს” უთხრა, რომ ავტოსაგზაო შემთხვევაზე სისხლის სამართლის საქმეც აღიძრა, რადგან გიორგი კონცელიძის მანქანაში მყოფი ფეხმძიმე ქალი დაშავდა.
ტოგო ჭელიძე: “მძღოლებს სხეულის დაზიანება არ მიუღიათ, დაზიანდა მანქანები და მეორე მხარე მანქანის გარემონტების ხარჯებსაც მოითხოვს ჩვენგან. გამოძიება შეწყდა, მაგრამ ავარიის დღესვე პატრულმა ჯარიმა გამოუწერა დავით ოქროპილაშვილს. მან ჯარიმა არ გადაიხადა და სარჩელით სასამართლოს მიმართა”.
