Batumelebi | ყოფილ სამხედრო ბინებში მცხოვრებ პირთა მესაკუთრეობის საკითხს კომისია გადახედავს ყოფილ სამხედრო ბინებში მცხოვრებ პირთა მესაკუთრეობის საკითხს კომისია გადახედავს – Batumelebi
RU | GE  

ყოფილ სამხედრო ბინებში მცხოვრებ პირთა მესაკუთრეობის საკითხს კომისია გადახედავს

 

დღეს, 13 თებერვალს, გამართულ აჭარის მთავრობის სხდომაზე იმ საცხოვრებელი ფართობების გამოყენების წესი განიხილეს, რომლებიც წლების განმავლობაში თავდაცვის სამინისტროს დაქვემდებარებაში იყო და რომლითაც სამხედრო პირები და მათი ოჯახის წევრები სარგებლობდნენ. შემდეგ კი ქონება აჭარის მთავრობას გადმოეცა. 

 

როგორც სხდომაზე განაცხადეს, ასეთი დაახლოებით 450 ბინაა, რომლებიც აჭარის სხვადასხვა რეგიონშია განთავსებული. 90 ბინა განთავსებულია ბათუმში, სვიშევსკის ქუჩაზე არსებულ საცხოვრებელ კორპუსში, 79 ბინა _ ლერმონტოვის ქუჩაზე, ე.წ. „სამხედრო დასახლებაში“, 6 ბინა _ სახოკიას ქუჩაზე, 45-მდე კი _ ხულოს მუნიციპალიტეტში.

 

როგორც სხდომაზე განაცხადეს, აღნიშნული ბინებით არა მარტო სამხედრო პირები და მათი ოჯახები სარგებლობენ, ბინებს თვითნებურად შესახლებული პირებიც ფლობენ.

 

„სწორედ ამ მიზნით შეიქმნა კომისია, რომ დადგენილიყო რა კატეგორიის მოქალაქეებს აქვთ საცხოვრებელი ფართობები დაკავებული. იმისთვის, რომ პირს აღნიშნული ქონება კერძო საკუთრებაში გადაეცეს, აუცილებელია ჰქონდეს ბინის მფლობელობის ორდერი ან რაიმე დოკუმენტი, რომელიც გაცემულია სახელმწიფო უწყების მიერ. თვითნებურად შესახლებულ პირებს ბინები არ დაუკანონდებათ, მათთვის ცალკე წესია განსასაზღვრი“-განაცხადა აჭარის მთავრობის აპარატის იურიდიული დეპარტამენტის უფროსის მოადგილემ, დავით გაბაიძემ.  

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე