ბათუმში 4 წლის ბიჭს, ახლობლების თქმით, მენინგოკოკური ინფექცია დაუდგინდა. ბავშვის მამიდას, შორენა ბერიძის ინფორმაციით, რომელიც ამჟამად ბავშვთან ერთად იმყოფება თბილისში, 4 წლის ბიჭის მდგომარეობა გუშინ, ღამით დამძიმდა.
„ბავშვი შოკში იყო და თავში ხელებს ირტყამდა, სასწრაფო გამოვიძახეთ დილით 12 საათისკენ. სასწრაფოს ექიმმა გვითხრა, ყურები სტკივა და ისეთი არაფერი არ სჭირსო, თუმცა ჩვენ მაინც გადავიყვანეთ ბათუმის ბავშვთა საავადმყოფოში [ანგისაზე მდებარე დედათა და ბავშვთა ცენტრი]. აუღეს ანალიზები, გადასხმაც გაუკეთეს და გამოგვიშვეს სახლში. ექიმი ხომ უნდა მიხვდეს რატომ აქვს ბავშვს შოკი. საღამოს 11 საათისკენ ბავშვი ისევ ცუდად გახდა და ხელმეორედ წავიყვანეთ საავადმყოფოში, უკვე გაუჩნდა შავი ლაქები სხეულზე,“ – ყვება ბავშვის მამიდა.
მისი თქმით, ექიმების მხრიდან არ იყო სათანადო ყურადღება: „შეუძლებელია ასეთი მწვავე ინფექციის დროს რაიმე ცვლილება არ ყოფილიყო სისხლის ანალიზში. მით უმეტეს რომ თვალებში ლაქები თავიდანვე შეიმჩნეოდა. ბავშვი ჯანმრთელიაო და უკან გამოგვატანეს, თუმცა ჩვენი პირადობები დაიტოვეს, 60 ლარი რომ გადაგვეხადა.
ხელმეორედ მიყვანის შემდეგ, უფრო მეტი ყურადღებით გასინჯეს და გვითხრეს, რომ მძიმე მდგომარეობაა და შეიძლება თბილისში გადაყვანამდე გარდაიცვალოს და ჩვენ პასუხისმგებლები ვერ ვიქნებითო“.
შორენა ბერიძე ამბობს, რომ ამ დროისთვის ბავშვის მდგომარეობა მძიმეა, თუმცა სხეულზე გამონაყარი შეუმცირდა. ბავშვის ოჯახი სოციალურად დაუცველია.
რატომ ვერ დადგინდა ანალიზების შედეგებით ინფექციური დაავადება პირველი ვიზიტის დროს და რა შემთხვევაშია საავადმყოფო პასუხისმგებელი სიტუაციის გართულების დროს? – ამ კითხვით დედათა და ბავშვთა ჯანმრთელობის დაცვის ცენტრის ხელმძღვანელობას მივმართეთ, თუმცა მათ საზოგადოებასთან ურთიერთობის სამსახურში, თამარ ჩეჩელაშვილთან გადაგვამისამართეს. იგი ფაქტზე კომენტარის გაკეთებას სიტუაციაში გარკვევის შემდეგ დაგვპირდა.
ამავე თემაზე:
რა სიმპტომები აქვს მენინგოკოკური ინფექციის ელვისებურ ფორმას
