Batumelebi | შორენა ღლონტი: საინფორმაციო უნდა იყოს უფრო დინამიური შორენა ღლონტი: საინფორმაციო უნდა იყოს უფრო დინამიური – Batumelebi
RU | GE  

შორენა ღლონტი: საინფორმაციო უნდა იყოს უფრო დინამიური

 

დღეს გადაწყდა, რომ გამოსაცდელი ვადით საზოგადოებრივი მაუწყებლის აჭარის ტელევიზიის საინფორმაციო სამსახურს შორენა ღლონტი უხელმძღვანელებს. შორენა ღლონტი  ტელეკომპანია „მეცხრე არხის“ ჟურნალისტი იყო, მანამდე კი „გურია ნიუსში“ მუშაობდა.  სამომავლო გეგმების შესახებ აჭარის ტელევიზიის საინფორმაციო სამსახურის ახალი ხელმძღვანელი „ბათუმელებს“ ტელეფონით ესაუბრა. 

 

 

 ელოდით, რომ აჭარის ტელევიზიის საინფორმაციო სამსახურის ხელმძღვანელი გახდებოდით?


ჩემთვის სრულიად მოულოდნელი იყო. ნამდვილად არ ველოდი გამარჯვებას. ვფიქრობ, რომ ძალიან ძლიერი კონკურენტები მყავდა. ჩემთვის დიდი პასუხისმგებლობაა საკონკურსო კომისიის მიერ ნდობის გამოცხადება.  მაქსიმალურად შევეცდები აჭარის ტელევიზიის საინფორმაციო გამოშვება გახდეს  რეიტინგული.  მოვიპოვოთ საზოგადოების და მაყურებლის ნდობა. მივაწოდოთ მათ ობიექტური და მიუკერძოებელი ინფორმაცია. ინტერესით მოველი  გუნდთან შეხვედრას. ვფიქრობ,  მას შემდეგ, რაც შევხვდები გუნდს,  უფრო შევძლებ  კონკრეტულ გეგმებზე საუბარს. ახლა ჩემთვის მთავარია გუნდთან შეხვედრა და მათი გაცნობა. ის გეგმები, რაც მე  მაქვს დასახული და რაზეც ვისაუბრე გასაუბრებაზე,  როგორ შეიძლება და რა ფორმით შეიძლება განხორციელდეს, ამაზე შემდგომ ვიზრუნებ.

 

რას შეცვლით ტელევიზიაში როდესაც იქ მიხვალთ, როგორც საინფორმაციო სამსახურის ხელმძღვანელი?


ვფიქრობ, უნდა შუქდებოდეს ყველა ახალი ამბავი. იქნება ეს  რეგიონის ახალი ამბავი თუ  ქვეყანაში მიმდინარე. მთავარი საინფორმაციო უნდა იყოს უფრო დინამიური. ვფიქრობ, დღის მანძილზე გაშუქდება ყველა ახალი ამბავი, მაგრამ მთავარი საინფორმაციო გამოშვება უნდა იყოს განსხვავებული. უნდა იყოს მეტი ანალიტიკური მასალა. პირველ ეტაპზე ვფიქრობ, რომ ნახევარ საათიანი იყოს საინფორმაციო გამოშვება. სავსებით საკმარისია ნახევარი საათი იმისათვის, რომ გაიგოს მაყურებელმა რა ხდება რეგიონში.

 

თუმცა მომდევნო ეტაპზე ვფიქრობ უნდა გახანგრძლივდეს  საინფორმაციო გამოშვების დრო. საინფორმაციოს უნდა შეემატოს თოქ-შოუს ელემენტები. რაც გამოიხატება იმაში, რომ იგივე  მთავარ თემებზე ეთერში მოწვეული იყოს სტუმრები, პირდაპირი ჩართვები რომ ხდებოდეს საინფორმაციოში…

 

გუნდიდან, რომელიც საინფორმაციოს აკეთებს, ბევრს არ ვიცნობ. მოუთმენლად ველი მათთან შეხვედრას და შემდეგ მუშაობას.  

ნეტგაზეთის მასალების სხვა გამოცემებში გადაბეჭდვის წესი
მანანა ქველიაშვილი