„სახურავი პროექტში სხვა ფერია და ახლა რაცაა, ის სხვა ფერია. მივეცით გაფრთხილება და 10 ათასი ლარით დავაჯარიმეთ. იყო კიდევ წვრილმანები, 6 თვე აქვთ ვადა, რომ ხარვეზი გამოასწორონ და მერე ჩავიბარებთ შენობას,“ – აცხადებს ბიძინა აფხაზავა.
მისივე თქმით, თოჯინების თეატრის სახურავის ფერი, რომელიც ამჟამად შინდისფერია, პროექტის მიხედვით ვერცხლისფერი უნდა იყოს. კითხვაზე, როგორ უნდა მოხდეს ხარვეზის გამოსწორება, ბიძინა აფხაზავა პასუხობს: „ახადონ, ან ფერი შეცვალონ“.
კულტურული მემკვიდრეობის ძეგლზე სარეაბილიტაციო სამუშაოების ნებართვა 2012 წლის 27 თებერვალს გაიცა. სამუშაოები 2012 წლის დეკემბერში უნდა დასრულებულიყო. ძეგლზე სარეკონსტრუქციო სამუშაოებს „თაკევ ინშაათი“ აწარმოებს.