Batumelebi | კონკურსის „ჩემი თვალით“ გამარჯვებულები გამოვლინდნენ კონკურსის „ჩემი თვალით“ გამარჯვებულები გამოვლინდნენ – Batumelebi
RU | GE  

კონკურსის „ჩემი თვალით“ გამარჯვებულები გამოვლინდნენ

 

დღეს „პრესკაფეში“  „მედია პორტალის“ მიერ მოქალაქე ჟურნალისტებისთვის გამოცხადებულ კონკურსში „ჩემი თვალით“ გამარჯვებულები გამოვლინდნენ. კონკურსი საქართველოს სამ ქალაქში ტარდებოდა, დღეს კი მხოლოდ ბათუმის კონკურსის მონაწილეებს შორის გამარჯვებულები დააჯილდოვეს. 

საუკეთესო ფოტო ამბისთვის “ეკოლოგიური დაბინძურება და განადგურებული ტყის მასივები” პრიზი დემურ ბოლქვაძეს გადაეცა.  საუკეთესო ვიდეო რეპორტაჟის ავტორი კი  თომა მალაყმაძე გახდა.  გამოვლინდა აუდიტორიის რჩეულიც.  გამარჯვება  ხატია ზუხუბაიას ხვდა წილად ვიდეოსთვის  “ბალერინას რთული და საინტერესო ცხოვრება”.

„ნამდვილად არ ველოდი გამარჯვებას.  ჩემი ფოტოამბავი შეეხებოდა  გარემოს დაბინძურებას. ეს აწუხებდა ჩემს ქალაქს, ქობულეთს. როდესაც ვიღებდი,  ვიყავი დილემის წინაშე. იმიტომ რომ ის ადამიანი ვინც ამას აკეთებდა იყო მამაჩემის მეგობარი, თუმცა საბოლოოდ გადავწყვიტე ფოტოები კონკურსზე გამეგზავნა,“ – უთხრა „ბათუმელებს“ კონკურსის გამარჯვებულმა დემურ ბოლქვაძემ.

საუკეთესო ვიდეო სიუჟეტის ავტორი 15 წლის თომა მალაყმაძე გახდა. ვიდეომ, „ბათუმის ცენტრალურ ქუჩებზე ნაგვის ურნებს ვერ შეხვდებით” ჟიურის მოწონება დაიმსახურა.

„ჩემი  ვიდეო ბათუმში ნაგვის ურნების დეფიციტს ეხებოდა. მოულოდნელი იყო ჟიურის გადაწყვეტილება. ძალიან გამიხარდა. კარგია თუ ასეთი პროექტები გაგრძელდება და მეტი ახალგაზრდა ჩაერთვება,“ – ამბობს თომა მალაყმაძე.

„ბალეტი არის ის რაც ჩემთვის ძალიან ბევრს ნიშნავს. ჩემს ვიდეოში  მინდოდა მეჩვენებინა  რომ  იმ ლამაზი სანახაობის მიღმა, რასაც ჩვენ სცენაზე ვხედავთ,  არის ძალიან დიდი შრომა ჩადებული,“ – ამბობს ხატია ზუხუბაია, კონკურსის კიდევ ერთი გამარჯვებული.

„ჯამში ძალიან კმაყოფილები ვართ ამ პროექტით.  ქუთაისში გვყავდა 12 მონაწილე, ბათუმში 18. რაც ნიშნავს რომ ორი თვის განმავლობაში ჩვენ ვიპოვეთ 30 აქტიური ადამიანი საქართველოს რეგიონებში რომელიც არიან პოტენციური მოქალაქე ჟურნალისტები. მათი  ნაწილი ჩვენ წავახალისეთ. რაც ნიშნავს იმას რომ ისინი აუცილებლად აიღებენ თავიანთ ფოტოაპარატებს და როცა მათ ირგვლივ რაღაც მოხდება,  არ დაელოდებიან მედიას და მაშინვე გადაიღებენ,“ – უთხრა „ბათუმელებს“ პროექტის კოორდინატორმა გვანცა კიკალიშვილმა.

კონკურსი „ჩემი თვალით“ ამჟამად გორში გრძელდება. მისი დასრულების შემდეგ მოქალაქე ჟურნალისტებისთვის თბილისში სამდღიანი ტრენინგი გაიმართება.

ნეტგაზეთის მასალების სხვა გამოცემებში გადაბეჭდვის წესი
მანანა ქველიაშვილი