როგორ აპირებენ ყოფილი კოლეჯის შენობის გადაკეთებას ხელოვნების უნივერსიტეტად


ბათუმში, გორგილაძისა და ვაჟა-ფშაველას ქუჩების კვეთაში მდებარე ყოფილი კოლეჯის შენობის რეაბილიტაცია-მშენებლობისთვის ბიუჯეტში 2 მილიონ 703 ათას 154 ლარია გათვალისწინებული. შენობაში, რომელიც კულტურული მემკვიდრეობის ძეგლია, ბოლო დროს ბათუმის პირველი საჯარო სკოლის მოსწავლეები სწავლობდნენ.

ორსართულიანი შენობა ამჯერად დაცლილია. მშენებლობაზე გამოცხადებული ტენდერიც დასრულდა.

შენობის რეაბილიტაციას, ასევე მასზე მესამე სართულისა და ვერანდის დაშენებას, ბათუმის ხელოვნების სასწავლო უნივერსიტეტს კომპანია – შპს „ალიგატორი1“ 2 მილიონ 162 ათას 520 ლარად სთავაზობს. უნივერსიტეტის მიერ გამოცხადებულ ტენდერში მხოლოდ ეს ერთი კომპანია მონაწილეობდა. გამოცხადდება თუ არა ის გამარჯვებულად, სატენდერო კომისია გადაწყვეტს. გადაკეთებულ შენობაში ხელოვნების უნივერსიტეტი უნდა განთავსდეს.

„ბათუმის ხელოვნების სასწავლო უნივერსიტეტის“ განთავსებისთვის „ბათუმში, ზურაბ გორგილაძის/ვაჟა-ფშაველას ქუჩაზე, N19/32-ში მდებარე შენობა-ნაგებობის  რეაბილიტაცია/რეკონსტრუქცია/მშენებლობის სამუშაოები – კულტურული მემკვიდრეობის უძრავი ძეგლის რეაბილიტაცია“, სატენდერო დოკუმენტების მიხედვით 2018 წელს უნდა დასრულდეს – ხელშეკრულების გაფორმებიდან 12 თვის ვადაში. „ვადის გადაწევის საფუძველს არ წარმოადგენს თოვა, წვიმა და სხვა მსგავსი მოვლენები,“ – აღნიშნულია სატენდერო დოკუმენტებში.

დოკუმენტში ასევე აღნიშნულია, რომ „ვინაიდან შენობა წარმოადგენს კულტურული მემკვიდრეობის უძრავ ძეგლს, მომწოდებელი ვალდებულია სარეაბილიტაციო სამუშაოების განხორციელების დროს ზედმიწევნით და სრულად დაიცვას „კულტურული მემკვიდრეობის შესახებ“ საქართველოს კანონის მოთხოვნები“.

 

ყოფილი კოლეჯი გორგილაძეზე (3)

კულტურული მემკვიდრეობის ძეგლი გორგილაძისა და ვაჟა-ფშაველას კვეთაში, ბათუმი / 10.02.2017 / ფოტო: თედო ჯორბენაძე

ყოფილი კოლეჯი გორგილაძეზე (2)

ასეთი იქნება შენობა რეაბილიტაცია-მშენებლობის შემდეგ / რენდერი სატენდერო დოკუმენტაციიდან

ყოფილი კოლეჯი გორგილაძეზე (1)

რენდერი სატენდერო დოკუმენტაციიდან

ყოფილი კოლეჯი გორგილაძეზე (1)

რენდერი სატენდერო დოკუმენტაციიდან

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com