პარლამენტის წევრმა მურმან დუმბაძემ კომენტარი გააკეთა იმ სარჩელთან დაკავშირებით, რომელიც მისი ღირსების დასაცავად აჭარის უმაღლესი საბჭოს წევრმა მედეა ვასაძემ შეიტანა სასამართლოში არასამთავრობო ორგანიზაცია „კორუფციასთან ბრძოლის საინფორმაციო ცენტრის“ ხელმძღვანელის მერაბ ღოღობერიძის წინააღმდეგ.
მედეა ვასაძე მერაბ ღოღობერიძეს ბრალს სდებს სოციალურ ქსელებში მურმან დუმბაძის ღირსებისშემლახველი კამპანიის წარმოებაში და მურმან დუმბაძის სახელით ყალბი პროფაილების შექმნაში, სადაც პირადი მიმოწერები იყო გასაჯაროვებული.
„მე თვითონ გაკვირვებული დავრჩი, როცა ვნახე რამდენი რამე გაუკეთებია ამ ახალგაზრდას ჩემს სასარგებლოდ. ფიქრობს ჩემზე, საიტებს ქმნის, წერილებს წერს, მოკლედ დღე და ღამე ჩემზე ზრუნავს. ვურჩევ, მეტი იზრუნოს, მაგრამ უფრო ღირსეულად“- აცხადებს მურმან დუმბაძე.
მურმან დუმბაძე ამბობს, რომ სოციალურ ქსელებს იშვიათად იყენებს და მხოლოდ წერილების შესამოწმებლად შედის „ფეისბუკში“:
„ის პროფაილები რომელიც შექმნილია ჩემი სახელით, მე არ მეკუთვნის. მე პროფესიით მათემატიკოსი გახლავართ, პროგრამისტი, მაგრამ სოციალურ ქსელს იშვიათად ვიყენებ.
ქალბატონი თამარ თაბუკაშვილი რომელიც მიმოწერებშია ნახსენები, პირველი ოქტომბრის მერე არ მინახავს, ეს გოგო ძალიან აქტიური იყო არჩევნებამდე. დაუსაქმებელია ისიც და მერაბ ღოღობერიძეც და საქართველოს მოქალაქეები რომ დასაქმდნენ, ჩვენ ამისთვის ვზრუნავთ.“
