განათლების სამინისტროს შპს „საგანმანათლებლო რესურსები“ 44 900 000 ლარზე გამარტივებულ შესყიდვას ითხოვს. აღნიშნული თანხის დახარჯვას საქართველოს განათლების სამინისტრო სკოლის ფორმების შეკერვაზე აპირებს.
სახელმწიფო შესყიდვების სააგენტოზე განთავსებული ინფორმაციის მიხედვით, 2026-2027 სასწავლო წლისთვის, დაწყებითი საფეხურის მოსწავლეების უნდა შეიკეროს 1 801 000 ერთეული ფორმა. შესყიდვის ღირებულება 44 900 000 ლარით განისაზღვრა.
შესყიდვის მასალების მიხედვით, დაწყებითი საფეხურის მოსწავლეების სასკოლო ფორმის მიწოდების ვადა ორ ეტაპად არის განსაზღვრული.
პირველ ეტაპზე, საქონლის არანაკლებ 30%-ის მოწოდების ვადა არაუგვიანეს 31 ივლისისა განისაზღვრა, მეორე ეტაპი კი – არაუგვიანეს 20 აგვისტოს ჩათვლით.
გამარტივებულ შესყიდვაზე თანხმობის მისაღებად „საგანმანათლებლო რესურსებმა“ სახელმწიფო შესყიდვების სააგენტოს მიმართა.
„ოცნების“ მთავრობის განკარგულების პროექტში კი ვკითხულობთ: „სახელმწიფოებრივი და საზოგადოებრივი მნიშვნელობის ღონისძიებების შეზღუდულ ვადებში შეუფერხებლად ჩატარების მიზნით, შპს „საგანმანათლებლო რესურსებს“ მიეცეს უფლება გამარტივებული შესყიდვის საშუალებით განახორციელოს სასკოლო ფორმების სახელმწიფო შესყიდვა“.
______________________
ამ თემაზე:
სასკოლო ფორმების დიზაინი ცნობილია – სამინისტრო ბაზრის კვლევას ატარებს