„აი, რა გაახარებდა ჩვენს პატრიარქს“ – წერს არმაზ ახვლედიანი საკუთარ ფეისბუქის გვერდზე.
პოლიტიკოსი, თბილისის პოლიტიკური სწავლების სკოლის დამფუძნებელი იმ უნიკალური შანსს განიხილავს, რაც შეიძლება გამოიყენოს მმართველმა პოლიტიკურმა ძალამ ქვეყანაში არსებული კრიზისის დასაძლევად.
„ახლა, ამ საყოველთაო მწუხარების ჟამს, მკაფიოდ შეიგრძნობა დაღონებული ხალხის ჩუმი, დიდი სურვილი, ამჯერად მაინც გავითვალისწინოთ პატრიარქის მუდმივი ზრუნვის, მთავარი დარდისა და ზოგჯერ უთქმელადაც გასაგები მოწოდების არსი: ყველამ გადავდგათ საჭირო კეთილგონივრული ნაბიჯები სასიცოცხლოდ აუცილებელი ეროვნული თანხმობის მისაღწევად!
მმართველ პოლიტიკურ ძალას ეძლევა უნიკალური შანსი, წავიდეს რეალურ კომპრომისზე და დიდი თანხმობისა და ქვეყნის ჩიხიდან გამოყვანის მიზნით გაათავისუფლოს პოლიტიკური ნიშნით საპყრობილებში მყოფნი, შეცვალოს ბოლოდროინდელი რეპრესიული კანონები.
ოპოზიციამ და პროტესტში მყოფმა საზოგადოებამ კი ასევე გადადგას შემხვედრი ნაბიჯები და ურთიერთპატივისცემით დაიწყოს ჯანსაღი დისკუსია ჩიხიდან სწრაფად გამოსვლის სხვა აუცილებელ, ორმხრივად კომპრომისულ ზომებზე.
აი, რა გაახარებდა ჩვენს პატრიარქს და რა დაგვაყენებდა ქვეყნის დამშვიდების, წარმატებისა და სამართლებრივ სახელმწიფოდ ჩამოყალიბების ევროპულ, ერთადერთ სწორ, გზაზე!“ – წერს არმაზ ახვლედიანი.
საქართველოს კათოლიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი, ილია მეორე 17 მარტს, 93 წლის ასაკში, საპატრიარქო ტახტზე ასვლიდან 49-ე წელს გარდაიცვალა.
კათოლიკოს-პატრიარქს კვირას, 22 მარტს, სიონის საპატრიარქო ტაძარში დაკრძალავენ.
