ბათუმში, სელიმ ხიმშიაშვილისა და ჭავჭავაძის ქუჩების კვეთაში საკანალიზაციო სისტემაა დაზიანებული.
საკანალიზაციო ქსელიდან ამოსული მასა მანქანის სავალ გზაზეა გადასული.
ფაქტის ამსახველი ფოტოები “ბათუმელებს” მოაწოდეს. როგორც მოქალაქებმა გვითხრეს, შეტყობინება საკანალიზაციო სისტემის დაზიანების შესახებ “ბათუმის წყალში” 17 იანვარს, დაახლოებით საღამოს 10 საათისათვის გააკეთეს, თუმცა ქუჩის გასაწმენდად ამ დრომდე [18 იანვარი, 17:00 საათი] არავინ მისულა.
“ბათუმელებმა” ინფორმაცია გაადაამოწმა “ბათუმის წყალში”.
როგორც ცხელ ხაზზე გვითხრეს, დაზიანების შესახებ ინფორმაცია აქვთ და ჯგუფი გავა.
“სელიმ ხიმშიაშვილის 22-იდან გვაქვს შეტყობინება. გვაქვს ჩანიშნული და გავლენ. ეტაპობრივად ყველა მისამართზე გავლენ. ვერ გეტყვით კონკრეტულ დროს როდის გავლენ, მაგრამ დღეს ღამის 12-მდე გავლენ,” – უთხრეს “ბათუმელებს” “ბათუმის წყალში”.
განახლება:
მასალის გამოქვეყნების შემდეგ გამოცემას დაუკავშირდნენ “ბათუმის წყლიდან” და გვითხრეს, რომ არსებული მონაკვეთი უკვე გაწმენდილია.
“როცა თქვენ დაგვირეკეთ, თურმე მაგ დროს იწმინდებოდა ეგ მონაკვეთი [იგულისხმება სელიმ ხიმშიაშვილის ქუჩა 22]. ამჯამად ტერიტორია გაწმენდილია. მალე მივა სპეც ტექნიკა და გადარეცხავს ქუჩა”, – გვითხრეს “ბათუმის წყალში”.
“ბათუმის წყლის” ინფორმაციით დაზიანებული კანალიზაციის შესახებ ინფორმაცია მათთან მხოლოდ დღეს, 18 იანვარს შევიდა, დაახლოებით 16:00 საათისათვის და გუშინ, 17 იანვარს მათთვის არავის მიუმართავს.
