„ხელმეორედ მომიკლეს შვილი… ვერსად ვნახე სამართალი,“ – ეს თემურ მგალობლიშვილმა გვითხრა. ის გიორგი მგალობლიშვილის მამაა, რომელიც გასული წლის 9 სექტემბერს ქობულეთში ელექტროსადენებთან კონტაქტის შედეგად გარდაიცვალა. 24 წლის გიორგი ქობულეთის გამგეობაში მუშაობდა ინფრასტრუქტურის სამსახურის მთავარ სპეციალისტად. მას დავალების შესრულება ქობულეთის გამგებელმა სთხოვა. გიორგი რუსთაველის ქუჩაზე სატვირთო მანქანიდან დატვირთული ბორდიურების ამწით ჩამოტვირთვის დროს დაიღუპა.
სამუშაოს წარმოებისას უსაფრთხოების წესების დარღვევაზე გამოძიება გიორგი მგალობლიშვილის გარდაცვალებისთანავე, 9 სექტემბერს დაწყებულა. გამოძიება დაახლოებით თვენახევარში, 30 ოქტომბერს შეწყდა, თუმცა ამის შესახებ გიორგის ოჯახმა შვიდი თვის შემდეგ გაიგო. „გამომძიებელმა რომ დამკითხა, მერე აღარ მინახავს. პოლიციაში და ქობულეთის გამგეობაშიც მეუბნებოდნენ, მიმდინარეობს ძიება და ყველაფერი გაირკვევაო… ვეუბნებოდი, ყველაფერს ავიტან, ოღონდ ისევ ჩემს შვილს ნუ დააბრალებთ ყველაფერს, თავიდან ნუ მომიკლავთ-მეთქი. მაისში შემახვედრეს პროკურორს და აღმოჩნდა, რომ ყველაფერი ჩემი შვილისთვის შეუხოციათ.
არადა ჩემს შვილს არ ევალებოდა ბორდიურების ჩამოცლა, მას არც ძაბვის გამორთვა შეეძლო,“ – გვიყვება თემურ მგალობლიშვილი.
მაისამდე თემურ მგალობლიშვილს „ახალგაზრდა იურისტთა ასოციაციისთვის“ მიუმართავს დახმარებისთვის. ამის შემდეგ, საქმის პროკურორმა, ადილარ წირღვავამ მხარეს შვიდი თვის წინ ხელმოწერილი დადგენილებაც აჩვენა – „სისხლის სამართლის საქმეზე გამოძიების შეწყვეტის შესახებ“. პროკურორი ძირითადად ექსპერტიზის დასკვნას ეყრდნობა, რომლის მიხედვითაც, სამუშაოების წარმოების დროს უსაფრთხოების ნორმები დარღვეული იყო. იგივე დადგენილება ემყარება ამწეს მძღოლის ჩვენებას, რომელმაც გამოძიებას უთხრა, რომ უშუალოდ გიორგი მგალობლიშვილისგან მოისმინა იმის შესახებ, რომ „ენერგო-პრო ჯორჯია“ გაფრთხილებული იყო სამუშაოების შესრულების ადგილზე მაღალი ძაბვის სადენები გამოერთოთ.
„მიუხედავად გივი ბ.-ს მოწოდებისა გიორგი მგალობლიშვილზე, რომ ის მუშაობის დროს ამწე კრანთან არ მისულიყო, გიორგი მივიდა ამწესთან, რა დროსაც მარცხენა ხელით შეეხო ამწის ლითონის ე.წ. „ტროსს“, ხოლო მარჯვენა ხელი მოკიდა ტროტუართან იქვე დამონტაჟებულ მცირე ზომის ლითონის ბოძს, რა დროსაც გიორგი მგალობლიშვილი მოყვა ე.წ. „ელექტროველში“, რაზედაც ელექტროენერგიასთან კონტაქტის შედეგად მიიღო დაზიანება, წაიქცა და გაითიშა… ის ქობულეთის რაიონულ საავადმყოფოში გადაყვანის შემდეგ გარდაიცვალა“, – ვკითხულოთ საქმეზე გამოძიების შეწყვეტის შესახებ მიღებულ დადგენილებაში.
ქობულეთის გამგებელი, სულხან ევგენიძე
„საქმეზე არ ჩატარებულა სრულყოფილი გამოძიება,“ – მიიჩნევს საიას იურისტი პაატა დიასამიძე. ის განმარტავს, რომ ამ საქმეში მთავარი უსაფრთხოების დაუცველობა იყო, ხოლო გიორგი მგალობლიშვილს მისი უზრუნელყოფა არ შეეძლო. იურისტმა საქმის მასალებში „ენერგო-პრო ჯორჯიას“ მიერ პროკურატურისთვის გაგზავნილი წერილი გვაჩვენა, რომლის მიხედვითაც ენერგო კომპანიაში მაღალი ძაბვის გამორთვის შესახებ არც სატელეფონო შეტყობინება შესულა და არც წერილობითი განცხადება. „ზუსტი წესი არაა გაწერილი, როგორ უნდა გამოირთოს მაღალი ძაბვის ქსელი, მაგრამ დამკვიდრებული პრაქტიკაა, რომ ამას ითხოვს უშუალოდ გამგებელი, ან სამსახურის უფროსი. გიორგი მგალობლიშვილი იყო მთავარი სპეციალისტი. ის ვერ უზრუნველყოფდა უსაფრთხოების ზომების დაცვას ამ კუთხით. მოწმის გამოკითხვის ოქმიდან ჩანს, რომ გიორგიმ იცოდა ძაბვის გამორთვის შესახებ…“ – გვიყვება პაატა დიასამიძე.
რატომ ვერ უზრუნველყო ქობულეთის მუნიციპალიტეტის გამგეობამ უსაფრთხოების წესების დაცვა, როცა საკუთარ თანამშრომელს გამგებელმა კონკრეტული სამუშაოს შესრულება დაავალა? – კითხვაზე პასუხი არ გაგვცა ქობულეთის გამგებელმა, სულხან ევგენიძემ, ასევე ინფრასტრუტურისა და კეთილმოწყობის სამსახურის უფროსმა, ზაზა ოქროპირიძემ. პრესსამსახურის განმარტებით, მათ ამ თემაზე კომენტარის გაკეთება არ სურთ.
„მე თვითონ მიკვირდა, როგორ მოხდა ეს… სულხან ევგენიძე ხომ ენერგო კომპანიაში მუშაობდა წლების განმავლობაში და როგორ არ იცოდა, მაღალი ძაბვის გამორთვა რომ იყო საჭირო. რამდენჯერმე დავუსვი ეს კითხვა, მაგრამ არაფერი მიპასუხა… მერე ვნახე, გარდაცვალების დღეს უთქვამს ტელევიზიებთან, სწორად უნდა ემუშავათ, დენის გამორთვა არ იყო საერთოდ საჭიროო“, – ამბობს თემურ მგალობლიშვილი.
ის არ გამორიცხავს, რომ გამოძიების შეწყვეტა სულხან ევგენიძის ინტერესშიც შედიოდეს: „წრეა შეკრული, წრე, რომელსაც ვერ ვარღვევთ… არ უნდათ კონკრეტული პირებს პასუხი მოსთხოვონ და ამიტომაც შეწყდა გამოძიება, ალბათ“.
საქმის მასალების მიხედვით, სულხან ევგენიძემ გამგეობის მთავარ სპეციალისტს, გიორგი მგალობლიშვილს ზეპირსიტყვიერად სთხოვა სატვირთო მანქანაზე დაწყობილი ბორდიურების ჩამოცლა და ქუჩაზე დაწყობა. საიაში განმარტავენ, რომ გამგეობის შიგა განაწესით შესაძლებელი იყო მსგავსი დავალების გაცემა. „საქმიდან ჩანს, რომ წინა ტენდერიდან იყო მორჩენილი ეს ბორდიურები და განცხადება იყო შესული რუსთაველის ქუჩიდან ბორდიურის დაგებაზე. შესაბამისად, მოთხოვნა არსებობდა. ირკვევა, რომ გამგებელმა თავისი ჯიბიდან გადაუხადა ფული ამწეს მძღოლს ამ სამუშაოს შესასრულებლად. პრობლემა არის უსაფრთხოება, რომლის დაცვისთვის გამგეობას, ფაქტია, რომ არ უზრუნია“, – ამბობს პაატა დიასამიძე.
მას შემდეგ, რაც პროკურატურის დადგენილება გარდაცვლილილს მამას ჩაბარდა, „ახალგაზრდა იურისტთა ასოციაციას“ შემთხვევის ადგილზე სხვადასხვა მოწმე გამოუკითხავს. იურისტი პაატა დიასამიძე გვიყვება, რომ საქმეში არაერთი საეჭვო გარემოება გამოიკვეთა: „რამდენიმე თვითმხილველი საერთოდ არაა დაკითხული. ზოგიერთი კი მხოლოდ ზედაპირულად დაკითხა გამოძიებამ. მაგალითად, ერთ-ერთი ქალი, ვინც ამბობს, რომ გიორგი მის ხელში ჩაიკეცა, ამბობს, რომ ამწეს მძღოლი იყო ახალგაზრდა ბიჭი. მაგრამ ახალგაზრდა არაა გივი ბ. რომელიც გამოძიებამ დაკითხა, როგორც ამწეს მძღოლი. არსებობს ვერსია, რომ მოწმის ჩვენების მიხედვით, ადგილზე იმყოფებოდა სულხან ევგენიძეც, რომელიც დახვდა მანქანას და მას შემდეგ, როცა გიორგი მუშაობას შეუდგა, მან ტერიტორია დატოვა… არსებობს მოწმე, ვინც ამბობს, რომ ადგილზე იმყოფებოდა გამგეობის ინფრასტრუქტურისა და კეთულმოწყობის სამსახურის უფროსი ზაზა კაიკაციშვილი, მაგრამ გიორგი მარტო აწყობდა ბორდიურებს ქუჩაში. ფაქტია, რომ გამოძიებას აქვს სამუშაო“.
გამოძიების განახლების მოთხოვნით „ახალგაზრდა იურისტთა ასოციაციამ“ უკვე მიმართა პროკურატურას მიმდინარე წლის სექტემბერში. დღემდე პროკურატურას არ მიუწოდებია ინფორმაცია მხარისთვის, განახლდა თუ არა გამოძიება გიორგი მგალობლიშვილის საქმეზე.
კითხვებზე პასუხი პროკურატურაში არც „ბათუმელებს“ გასცეს.
