„ნაციონალური მოძრაობის“ წევრი პეტრე ზამბახიძე ამბობს, რომ მათმა დამკვირვებლებმა დააფიქსირეს უკვე მარკირებაგავლილი ამომრჩევლების მიერ ხმის მიცემის მცდელობის შემთხვევები:
„დავაფიქსირეთ რამდენიმე ფაქტი – 90-ე უბანზე, სადაც სამი ამომრჩეველი მივიდა, რომელთაც უკვე ჰქონდათ მარკირება გავლილი, ასევე მე-6 უბანზე იყო ორივე ხელზე მარკირება გავლილი ამომრჩეველი, რომელიც მე-6 უბანზე აპირებდა დამატებით (მესამედ) ხმის მიცემას. შესასვლელში ჩვენი დამკვირვებლები და პარტიის წარმომადგენლები არიან მოწოდების სიმაღლეზე და მათ აღმოაჩინეს ეს ფაქტი უკვე ორჯერ, მარკირებაგავლილ ამომრჩეველს რომ კიდევ უნდოდა ხმის მიცემა, ვიდეო გვაქვს” – ამბობს პეტრე ზამბახიძე.
ამ დროისთვის ბათუმში “ნაციონალური მოძრაობის” დამკვირვებლებს 20-მდე საჩივარი აქვთ დაწერილი.
„ბათუმელები“ ცესკოს დაუკავშირდა, სადაც გვითხრეს, რომ ინფორმაციას ამის შესახებ არ ფლობენ. #6 უბანზე ამ საკითხზე საჩივარი არ დაწერილა.
პეტრე ზამბახიძის თქმით, ასევე, მათ დამკვირვებლებს ვიდეოგადაღებაში ხელს უშლიან: „არ აძლევენ საშუალებას დააკვირდნენ რეგისტრაციის პროცესს ისევე, როგორც მარკირების შემოწმების პროცესს. შემთხვევა იყო უბნიდან ნაციონალური მოძრაობის წევრის გაძევების. ჩვენ მივეცით ინსტრუქცია [ჩვენს დამკვირვებლებს], რომ მაქსიმალურად, ადგილზე არანაირი წინააღმდეგობა არ გაწიონ, რადგან მითითება აქვთ, რომ უბნიდან გააძევონ ყველა. ჩვენთვის მნიშვნელოვანია ხმების დათვლის პროცესი და ის, რომ კარუსელი არ დატრიალდეს” – ამბობს ის.
