Batumelebi | ქართველი და უცხოელი პროფესორების ლექციები ბსუ-ში ქართველი და უცხოელი პროფესორების ლექციები ბსუ-ში – Batumelebi
RU | GE  

ქართველი და უცხოელი პროფესორების ლექციები ბსუ-ში

დღეს 6 ოქტომბერს, ბათუმის შოთა რუსთაველის სახელმწიფო უნივერსიტეტში, ახალი პროექტის – „მედია და კულტურის მეცნიერების მიმართულების განვითარების“ ფარგლებში, ქართველი და გერმანელი პროფესორების მონაწილეობით, მედიისა და  კულტურის  საკითხებზე სემინარები და დისკუსიები გაიმართება.

14:00 საათზე  უნივერსისტეტის 55-ე აუდიტორიაში,  თემაზე, – „ადამიანი და კულტურის სამყარო“, ლექციას წაიკითხავს მიუნსტერის უნივერსიტეტის პროფესორი, ლუდვიგ ზიპი და ილიას სახელმწიფო უნივერსიტეტის პროფესორი გიორგი მაისურაძე. თემაზე – „სამეცნიერო ტექნიკური მოდერნულობა და ფილოსოფიური ეთიკა“.

ლექციების ციკლი გაგრძელდება 7 ოქტომბერსაც. 11:00 საათზე, ამავე აუდიტორიაში გაიმართება პანელ-დისკუსია „რელიგია და კულტურის სამყარო“.  მომხსენებლები ილიას უნივერსიტეტის პროფესორები არიან.

მამუკა ბერიაშვილი ისაუბრებს თემაზე „კულტურული სამყაროს დაფუძნება რელიგიის მიერ“, გიორგი მაისურაძე , – „რას ნიშნავს კულტურული ნაცია?“, თათა ცოფურაშვილი, – „რეფორმაციის ისტორიული, კულტურული და ფილოსოფიური კონტექსტები“ და მარიამ ხაზარაძე ისაუბრებს თემაზე, – „კულტურული სამყაროს დაფუძნება კანტის „ადამინათა ისტორიის სავარაუდო დასაწყისის მიხედვით“.

რუსთაველის უნივერსიტეტის ინფორმაციით, პროექტი  „მედია და კულტურის მეცნიერების მიმართულების განვითარება“ პრეზიდენტის ფონდის მიერაა დაფინანსებული და მიზნად ისახავს ბსუ-ში მედიისა და კულტურის მეცნიერების საბაკალავრო პროგრამის მომზადებას, შესაბამისი კურიკულუმების ჩამოყალიბება-განვითარებას,  მედიისა და კულტურის მეცნიერების საბაზისო ლიტერატურის, სახელმძღვანელოების, გზამკვლევის თარგმნასა  და სატელევიზიო სტუდიის ამოქმედებას.

„მიმართულების  ევროპული სტანდარტებით ჩამოყალიბებისათვის დაგეგმილია შესაბამის უცხოურ უნივერსიტეტებთან აქტიური თანამშრომლობა, როგორც საგანმანათლებლო პროგრამის, ასევე საზაფხულო სკოლების, სემინარებისა და ვორქშოფების ფარგლებში“.

პროექტი 2016 წლის სექტემბრიდან დეკემბრის ჩათვლით პერიოდს მოიცავს და მას ქართველი და უცხოელი პროფესორები განახორციელებენ.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com