რუსეთის საგამოძიებო კომიტეტმა საქართველოს მოქალაქეს ზურაბ ქარჩავას დაუსწრებლად მიუსაჯა 6 წლითა და 6 თვით თავისუფლების აღკვეთა და მასზე ძებნა გამოცხადდა – რუსეთი მას ბრალს სდებს უკრაინის ომში მონაწილეობაში რუსეთის შეიარაღებული ძალების წინააღმდეგ.
„მტკიცებულებები… სასამართლომ საკმარისად მიიჩნია საქართველოს მოქალაქისთვის განაჩენის დაუსწრებლად გამოსატანად. ზურაბ ქარჩავა დამნაშავედ ცნო რუსეთის ფედერაციის სისხლის სამართლის კოდექსის 359-ე მუხლის მე-3 ნაწილით გათვალისწინებული დანაშაულის ჩადენაში (დაქირავებულის სტატუსით მონაწილეობა შეიარაღებულ კონფლიქტში)” – ნათქვამია განცხადებაში.
„უცხოელი მებრძოლების“ რუსულ ბაზაში ზურაბ ქარჩავაზე წერია, რომ იგი საქართველოს ეროვნულ ლეგიონს შეუერთდა 2022 წლის მარტის ბოლოს, როგორც ფსიქოლოგი.
რუსეთი ქართველ სამხედროებს საგანგებოდ წარმოაჩენს და ასამართლებს „დაქირავებულების“ სტატუსით, მაშინ, როცა მაგალითად, უცხოელ მოხალისეთა ლეგიონი უკრაინის თავდაცვის სამინისტროს ოფიციალური შენაერთია.
„ქარჩავა ამჟამად დაუსწრებლად არის დაკავებული და მასზე საერთაშორისო ძებნაა გამოცხადებული“ – წერს რუსული პროპაგანდისტული მედია.
რუსეთის მიერ უკრაინაში შეჭრისა და სრულმასშტაბიანი ომის დაწყებიდან რუსეთმა არაერთი ქართველი მებრძოლი გაასამართლა დაუსწრებლად.
