რუსული პროპაგანდისტული მედია Ria წერს, რომ რუსულმა ბანკმა ПСБ-მ, ოკუპირებულ აფხაზეთში მცხოვრები რუსეთის მოქალაქეობის მქონე პენსიონერებზე 20 ათასზე მეტი სადებეტო ბარათი გასცა.
რუსული მედიის ცნობით, ეს არის რუსეთის მოქალაქეობის მქონე თითქმის ყველა პენსიონერი, რომელიც აფხაზეთში ცხოვრობს.
ოკუპირებულ აფხაზეთში, Apsnypress-ის ცნობით, 24 ათასზე მეტი პენსიონერი იღებს რუსულ პენსიას, მათგან დაახლოებით 4 ათასი 80 წელზე მეტი ასაკისაა.
„2025 წლის აგვისტოდან აფხაზეთში მუდმივად მცხოვრები რუსეთის მოქალაქეობის მქონე პირებისთვის პენსიისა და სოციალური შეღავათების მიღების პროცედურა შეიცვლება: თანხები მხოლოდ რუსული ბანკი ПСБ-ის ბარათებზე ჩაირიცხება” – წერს Ria.
მედია წერს, რომ ბანკი აგრძელებს მოთხოვნების მიღებას მათგან, ვისაც ბარათები ჯერ არ აუღია.
რუსული ბანკის წარმომადგენლობა სოხუმში ხუთშაბათს, 10 ივლისს გაიხსნა.
ოკუპირებულ აფხაზეთში გაცემულ რუსულ სადებეტო საპენსიო ბარათებს აქვთ იგივე ფუნქცია, რაც რუსეთში გაცემულ ბარათებს, მათ შორის – გადახდების მიღება რუსეთის სოციალური ფონდიდან.
ამავე თემაზე:
