„ჩემთვის მკვლელები ხართ. არ ვაპირებ, რომ ადამიანურად არ გაპატიოთ, მაგრამ სამართლებრივად… მოვა დრო ამ ქვეყანაში, უმაღლესი თანამდებობის პირებიდან დაწყებული, აი, იმ გამხდარი ბიჭით დამთავრებული [მანდატური], იქ რომ ზის და ჰგონია არაფერს აშავებს, ყველა პასუხს აგებთ. იმიტომ კი არა, რომ შურისძიება მინდა…
თუ გინდათ, მოგიყვებით, როგორ მოგიკვდათ მამაჩემი. ჭიშკართან იპოვეს მკვდარი.
ბავშვობაში რომ რამე დამიშავებია, იმასაც კი ვნანობ. ასეთი გრძნობა თქვენ არ გაგაჩნიათ? – ხალხს მინდა მადლობა გადავუხადო. მიხარია, რომ ვიცხოვრე ისე, რომ დავიმსახურე ეს თანაგრძნობა“ – მიმართა სინდისის პატიმარმა ონისე ცხადაძემ პროკურორებს სასამართლო სხდომაზე დღეს, 4 ივლისს.
სინდისის პატიმარს, ონისე ცხადაძეს ცოტა ხნის წინ მამა გარდაეცვალა.
„გულწრფელად გისამძიმრებთ“ – უთხრა მას პროკურორმა ვაჟა თოდუამ,
„ვის რა ჯანდაბად სჭირდება, მაგრამ მადლობა. გულზე არაფერი არ სჭირდა მამაჩემს. პირველად მამაჩემის გულზე ხელი დავინახე იმ დღეს, როცა მაკავებდნენ. ეს დღეები სულ ვფიქრობ, სამაგიერო როგორ გადაგიხადოთ. სასამართლო არის ერთი სერიული მკვლელის. გამოდიოდნენ მის მიერ დახოცილი ადამიანების ოჯახის წევრები და შეურაცხმყოფელ სიტყვებს ამბობდნენ. ერთი მოკლულის მშობელი გამოვიდა მერე, სასულიერო პირი და იმან უთხრა, გპატიობო, იქ დამთავრდა ყველაფერი.“
მესმის, მაგრამ კორექტულადო, შენიშვნა მისცა მოსამართლე ნინო გალუსტაშვილმა ონისე ცხადაძეს.
„არ გესმით. მამათქვენი როგორ არის, ცოცხალი გყავთ? – ეჭვი არ მეპარება, რომ ეს ყველაფერი დამთავრდება ისე როგორც ჩვენ გვინდა. მაგრამ ეს ქვეყანა მეცოდება, რომელიც ამოსათრევი გვეყოლება. მე სიკვდილის შიში დიდი ხანია დამარცხებული მაქვს და ახლა კიდევ ერთი მიზეზი მაქვს, რომ არ მეშინოდეს. ჩემზე ნუ იდარდებთ. ქვეყანას მივხედოთ, ეს თხოვნა მაქვს თქვენთვის მხოლოდ. ეს მინდოდა, რომ მეთქვა“ – უპასუხა მან მოსამართლეს.
ონისე ცხადაძე ერთ-ერთია საპროტესტო აქციების დროს ჯგუფურ ძალადობაში ბრალდებულთაგან, რომლებიც, ერთმანეთს აქამდე არ იცნობდნენ, დანარჩენი 10 ბრალდებულის მსგავსად, ონისემაც სხვები სასამართლო დარბაზში ნახა პირველად.
___________
ფოტოზე: ონისე ცხადაძე. ფოტო: კადრი „ფორმულას“ ვიდეომასალიდან
ამავე თემაზე:
ვინ არის სინდისის პატიმარი ონისე ცხადაძე – იუმორისტი ბრალდებულის სკამზე
