ქუთაისი-ბათუმის მიმართულებით მოძრავ მატარებელს ლანჩხუთში ცეცხლი გაუჩნდა – ინფორმაციას ამის შესახებ „გურია ტვ“ ფაქტის თვითმხილველებზე დაყრდნობით ავრცელებს. საქართველოს რკინიგზა ცეცხლის გაჩენას უარყოფს, თუმცა ადასტურებს, რომ მატარებლის გაჩერების მიზეზი დაზიანება გახდა.
შემთხვევის შედეგად არავინ დაშავებულა.
„გურია ტვ“- ის თანახმად, ცეცხლი ვაგონებსშორის გადაბმაში გაჩნდა და მისი ჩაქრობა მემანქანეებმა და ლანჩხუთის რკინიგზის სადგურის თანამშრომლებმა ერთობლივად შეძლეს.
ფოტოებზე, რომელიც თვითმხილველმა გადაიღო, ასახულია ცეცხლმაქრის გამოყენების შემდეგ ერთ-ერთ ვაგონში არსებული სიტუაცია.
თვითმხილველთა თქმით, მატარებელში მყოფი მგზავრები მიკროავტობუსებში გადაანაწილეს და ისე გადაიყვანეს ბათუმში.
მომხდარ ფაქტზე განცხადება გაავრცელა საქართველოს რკინიგზამ.
„20 მაისს, ქუთაისი-ბათუმის მიმართულებით მოძრავი მატარებელი ლანჩხუთის სადგურში გაჩერდა ტექნიკური პრობლემის გამო, კერძოდ, მიზეზი საკონტაქტო ქსელის მცირე დაზიანება გახდა. პრობლემა ოპერატიულად იქნა აღმოფხვრილი და ქუთაისი-ბათუმის მატარებლის მოძრაობა აღდგენილია, ამასთან, სხვა მატარებლებიც შეუფერხებლად მოძრაობენ.
აქვე განვმარტავთ – მედიაში გავრცელებული ინფორმაცია, რომ მატარებელს ცეცხლი გაუჩნდა, სიმართლეს არ შეესაბამება,“ – ნათქვამია საქართველოს რკინიგზის ადმინისტრაციის განცხადებაში.
ასე გამოიყურებოდა ქუთაისი-ბათუმის მიმართულებით მოძრავი მატარებლის ერთ-ერთი ვაგონი ცეცხლმაქრის გამოყენების შემდეგ
„ბათუმელებმა“ სცადა რკინიგზის პრესსამსახურთან დაკავშირება დამატებითი კითხვების დასასმელად, თუმცა რკინიგზაში ჩვენს ზარს არ უპასუხეს.
